ବୀରଭୂମି: ପଶ୍ଚିମବଙ୍ଗର ବୀରଭୂମି ଦେଇ ଯାଇଥିବା ୬୦ ନମ୍ବର ଜାତୀୟ ରାଜପଥରେ ଆଜି ଭୟଙ୍କର ସଡକ ଦୁର୍ଘଟଣା ଘଟିଛି । ରାଜ୍ୟ ପରିବହନ ବିଭାଗ ଏକ ବସ୍ ସହ ସାମ୍ନା ପଟୁ ଆସୁଥିବା ଅଟୋର ଜୋରଦାର ଧକ୍କା ହୋଇଛି । ଦୁର୍ଘଟଣା ଏତେ ଭୟଙ୍କର ଥିଲା ଯେ ଅଟୋଟି ସଂପୂର୍ଣ୍ଣ ଭାବେ ନଷ୍ଟ ହୋଇଯାଇଛି । ଏଥିରେ ଥିବା ୯ ଜଣ ଯାତ୍ରୀଙ୍କର ଘଟଣାସ୍ଥଳରେ ହିଁ ମୃତ୍ୟୁ ଘଟିଛି । ବୀରଭୂମି ଏସ୍ପି ନଗେନ୍ଦ୍ର ନାଥ ତ୍ରିପାଠୀ କହିଛନ୍ତି, ରାମପୁରହାଟ ନିକଟ ମାଲ୍ଲାପୁରଠାରେ ଏହି ଭୟଙ୍କର ଦୁର୍ଘଟଣା ଘଟିଛି । କ୍ଷମତାଠାରୁ ଅଧିକ ଲୋକ ଅଟୋରେ ଥିଲେ । ଏସବିଏସଟିସିର ଗୋଟିଏ ବସ୍ ସହ ଅଟୋର ଧକ୍କା ହେବାରୁ ଏତେବଡ ଦୁର୍ଘଟଣା ଘଟିଛି । ଖବର ପାଇ ଉଦ୍ଧାରକାରୀ ଦଳ ଓ ପୁଲିସ୍ ଘଟଣାସ୍ଥଳରେ ପହଞ୍ଚିଥିଲେ । ହେଲେ ସେତେବେଳେକୁ ଅଟୋରେ ଥିବା ୯ ଜଣଙ୍କ ମୃତ୍ୟୁ ହୋଇ ସାରିଥିଲା । ବସ୍ର ସାମ୍ନା ପଟେ ଅଟୋଟି ଏତେ ଜୋରରେ ମାଡ ହୋଇଥିଲା ଯେ ଏହାକୁ ବାହାର କରିବା ପାଇଁ ବେଶ କିଛି ସମୟ ପରିଶ୍ରମ କରିବାକୁ ପଡିଥିଲା । ଅଟୋରେ ଥିବା ଲୋକମାନେ କ୍ଷେତରେ କାମ ସାରି ନିଜ ଘରକୁ ଫେରୁଥିଲେ ।