ସୁରଜକୁଣ୍ଡ (ହରିୟାଣା): ଦେଶର ପ୍ରତି ରାଜ୍ୟରେ ରହିବ ଜାତୀୟ ଅନୁସନ୍ଧାନ ଏଜେନ୍ସି(ଏନଆଇଏ) ଅଫିସ । ଆସନ୍ତା ୨୦୨୪ ସୁଦ୍ଧା ସବୁ ରାଜ୍ୟରେ ଏହି ଅଫିସ ଖୋଲିଯାଇଥିବ । ଆଜି ଏହି ଗୁରୁତ୍ୱପୂର୍ଣ୍ଣ ଘୋଷଣା କରାିଛନ୍ତି କେନ୍ଦ୍ର ସ୍ୱରାଷ୍ଟ୍ରମନ୍ତ୍ରୀ ଅମିତ ଶାହ । ତାଙ୍କର ଏହି ଘୋଷଣା କେନ୍ଦ୍ର-ରାଜ୍ୟ କ୍ଷମତା ବଣ୍ଟନ ଉପରେ ଆଉ ଏକ ବିତର୍କ ସୃଷ୍ଟି କରିପାରେ । ବର୍ତ୍ତମାନ କେବଳ ଚାରୋଟି ମେଟ୍ରୋ ସହରରେ ଏନଆଇଏ ଦପ୍ତର ରହିଛି । ସେ କହିଛନ୍ତି ଯେ ଆଇନ ଏବଂ ଶୃଙ୍ଖଳା, ମୁଖ୍ୟତଃ ଏକ ରାଜ୍ୟ ବିଷୟ ଅଟେ । ତେବେ ଏନଆଇଏର “ଅତିରିକ୍ତ ଆଞ୍ଚଳିକ କ୍ଷମତା” ରହିଛି ।୨୦୦୮ରେ ଏହା ଗଠିତ ହୋଇଥିଲା ଏବଂ ୨୦୧୯ରେ ଏହାକୁ ଅଧିକ କ୍ଷମତା ପ୍ରଦାନ କରାଯାଇଥିଲା । ଏହାର ଅର୍ଥ ଏହା ଭାରତର ଯେକୌଣସି ସ୍ଥାନରେ ଘଟୁଥିବା ଅପରାଧର ଅନୁସନ୍ଧାନ କରିପାରିବ କିମ୍ବା ବିଦେଶରେ କାର୍ଯ୍ୟ କରିବ ଯାହାର ପ୍ରଭାବ ଏଠାରେ ଥିବ । ଏଥିପାଇଁ ରାଜ୍ୟଗୁଡିକର ବାଧ୍ୟତାମୂଳକ ଅନୁମତିର ଆବଶ୍ୟକତା ନାହିଁ । ବିଶେଷକରି ଅଣ-ବିଜେପି ଦଳ ଦ୍ୱାରା ଶାସିତ ରାଜ୍ୟମାନେ ଅଭିଯୋଗ କରିଛନ୍ତି ଯେ ନରେନ୍ଦ୍ର ମୋଦିଙ୍କ ସରକାର ସିବିଆଇ ଏବଂ ଇଡି ଭଳି କେନ୍ଦ୍ରୀୟ ଏଜେନ୍ସିଗୁଡ଼ିକୁ ରାଜନୈତିକ ପ୍ରତିଶୋଧ ପାଇଁ ବ୍ୟବହାର କରୁଛନ୍ତି । ବିଜେପି କହିଛି ଯେ ଏଜେନ୍ସିଗୁଡ଼ିକ କେବଳ “ଦୁର୍ନୀତି ନିବାରଣ ପାଇଁ ନିଜର କାର୍ଯ୍ୟ କରୁଛନ୍ତି” ।