ଡେରାଡୁନ୍,୮/୭ : ଉତ୍ତରାଖଣ୍ଡରେ ଆଜି ଏକ ବଡ଼ ଅଘଟଣରେ ୯ ଜଣଙ୍କର ମୃତ୍ୟୁ ଘଟିଛି । ଏକ କାର ନଦୀରେ ଖସି ପଡ଼ିବା ପରେ ଏହା ସ୍ରୋତରେ ଭାସି ଯାଇଥିଲା ଏବଂ ବହୁ ସମୟର ପରିଶ୍ରମ ପରେ ତାହାକୁ ଉଦ୍ଧାର କରାଯାଇଥିଲା । ପଞ୍ଜାବରୁ କିଛି ପର୍ଯ୍ୟଟକଙ୍କୁ ନେଇ ଆଜି ସକାଳେ ଉତ୍ତରାଖଣ୍ଡର ରାମନଗର ଅଭିମୁଖେ ଯାଉଥିବା ଏହି କାର୍ ଢେଲ୍ବା ନଦୀରେ ପଡି ପ୍ରଖର ସ୍ରୋତରେ ଭାସିଯିବାରୁ ୯ଜଣ ବ୍ୟକ୍ତିଙ୍କର ମୃତ୍ୟୁ ଘଟିଛି । କାର୍ ମଧ୍ୟରୁ ବର୍ତ୍ତମାନ ସୁଦ୍ଧା ୪ଜଣଙ୍କ ଶବ ଉଦ୍ଧାର କରାଯାଇଥିବା ବେଳେ ଆହୁରି ୫ଜଣଙ୍କ ଶବ ଉକ୍ତ କାର୍ ମଧ୍ୟରେ ଫସି ରହିଛି । ସେମାନଙ୍କ ଶବ ବାହାର କରିବା ଲାଗି ଉଦ୍ୟମ ଜାରି ରହିଛି । କାର୍ରେ ୧୧ଜଣ ଯାତ୍ରୀ ଥିଲେ । ଉତ୍ତରଖଣ୍ଡ ପୁଲିସ,ରାଜ୍ୟ ବିପର୍ଯ୍ୟୟ ପ୍ରଶମନ ବଳ ଏବଂ ଅଗ୍ନିଶମ ବିଭାଗ ଘଟଣାସ୍ଥଳରେ ପହଞ୍ଚି ଉଦ୍ଧାର କାର୍ଯ୍ୟରେ ଲାଗିଛନ୍ତି । ଜୀବନ୍ତ ଅବସ୍ଥାରେ ଉଦ୍ଧାର କରାଯାଇଥିବା ୨ଜଣ ମଧ୍ୟରେ ଅଛନ୍ତି ନାଜିଆ ନାମ୍ନୀ ଜଣେ ୨୨ ବର୍ଷୀୟ ଯୁବତୀ । ତାଙ୍କୁ ରାମନଗର ଡାକ୍ତରଖାନାରେ ଭର୍ତ୍ତି କରାଯାଇଛି । ଜିଲ୍ଲା ପ୍ରଶାସନ କହିବା ଅନୁସାରେ,ରାମନଗର କୋଟଦ୍ୱାର୍ ରାସ୍ତାରେ ଅବସ୍ଥିତ ‘କର୍ବଟ୍ ଜାତୀୟ ଉଦ୍ୟାନ’ ଢେଲ୍ବା ଜୋନ୍ରେ ଦୁର୍ଘଟଣାଟି ଘଟିଛି ।