ନୂଆଦିଲ୍ଲୀ। ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଭାରତ ଉପରେ ଶୁଳ୍କ ବୃଦ୍ଧି ଘୋଷଣା କରିବା ପରେ ଆଜି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ପ୍ରଥମ ପ୍ରତିକ୍ରିୟା ଆସିଛି। ପରୋକ୍ଷ ଭାବରେ ପ୍ରଧାନମନ୍ତ୍ରୀ ମୋଦି କହିଛନ୍ତି ଯେ ଆମ ପାଇଁ, ଆମର ଚାଷୀଙ୍କ ସ୍ୱାର୍ଥ ସର୍ବୋଚ୍ଚ ପ୍ରାଥମିକତା, ଯେକୌଣସି ମୂଲ୍ୟ ହେଉ।
ପ୍ରଧାନମନ୍ତ୍ରୀ ଆହୁରି କହିଛନ୍ତି,ଭାରତ କେବେବି ଚାଷୀ, ମତ୍ସ୍ୟଜୀବୀ ଏବଂ ଦୁଗ୍ଧ ଚାଷୀଙ୍କ ସ୍ୱାର୍ଥ ସହିତ ସାଲିସ କରିବ ନାହିଁ। ମୁଁ ବ୍ୟକ୍ତିଗତ ଭାବରେ ଜାଣେ, ଏଥିପାଇଁ ମୋତେ ବହୁତ ମୂଲ୍ୟ ଦେବାକୁ ପଡିବ, କିନ୍ତୁ ମୁଁ ଏଥିପାଇଁ ପ୍ରସ୍ତୁତ। ଆଜି ଭାରତ, ଦେଶର ଚାଷୀ, ମତ୍ସ୍ୟଜୀବୀ ଏବଂ ଦୁଗ୍ଧ ଚାଷୀଙ୍କ ପାଇଁ ପ୍ରସ୍ତୁତ।
ଏମଏସ ସ୍ୱାମୀନାଥନ ଶତବାର୍ଷିକୀ ଅନ୍ତର୍ଜାତୀୟ ସମ୍ମିଳନୀରେ ଭାଷଣ ଦେଇ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି କହିଛନ୍ତି ଯେ ପ୍ରଫେସର ସ୍ୱାମୀନାଥନଙ୍କ ସହ ମୋର ସମ୍ପର୍କ ବହୁ ବର୍ଷ ପୁରୁଣା। ଅନେକ ଲୋକ ଗୁଜରାଟର ପ୍ରାରମ୍ଭିକ ଅବସ୍ଥା ବିଷୟରେ ଜାଣନ୍ତି। ପୂର୍ବରୁ, ମରୁଡ଼ି ଏବଂ ଘୂର୍ଣ୍ଣିବାତ୍ୟା ଯୋଗୁଁ କୃଷିକୁ ବହୁତ ସଙ୍କଟର ସମ୍ମୁଖୀନ ହେବାକୁ ପଡୁଥିଲା ଏବଂ କଚ୍ଛରେ ମରୁଭୂମି ବିସ୍ତାର ହେଉଥିଲା। ଯେତେବେଳେ ମୁଁ ଗୁଜରାଟର ମୁଖ୍ୟମନ୍ତ୍ରୀ ଥିଲି, ଆମେ ମୃତ୍ତିକା ସ୍ୱାସ୍ଥ୍ୟ କାର୍ଡ ଉପରେ କାମ ଆରମ୍ଭ କରିଥିଲୁ।
ପ୍ରଧାନମନ୍ତ୍ରୀ ଆହୁରି କହିଛନ୍ତି, କିଛି ବ୍ୟକ୍ତିତ୍ୱ ଅଛନ୍ତି ଯାହାଙ୍କର ଅବଦାନ କୌଣସି ଗୋଟିଏ ଯୁଗ କିମ୍ବା କୌଣସି ଗୋଟିଏ କ୍ଷେତ୍ର ମଧ୍ୟରେ ସୀମିତ ନୁହେଁ। ପ୍ରଫେସର ଏମ୍ଏସ୍ ସ୍ୱାମୀନାଥନ ଜଣେ ଏପରି ମହାନ ବୈଜ୍ଞାନିକ, ଭାରତ ମାତାର ଜଣେ ସଚ୍ଚା ପୁତ୍ର ଥିଲେ। ସେ ବିଜ୍ଞାନକୁ ଜନସେବାର ମାଧ୍ୟମ କରିଥିଲେ। ସେ ଦେଶର ଖାଦ୍ୟ ସୁରକ୍ଷାକୁ ତାଙ୍କ ଜୀବନର ଲକ୍ଷ୍ୟ କରିଥିଲେ। ସେ ଏପରି ଏକ ଚେତନା ଜାଗ୍ରତ କରିଥିଲେ ଯାହା ଆଗାମୀ ଅନେକ ଶତାବ୍ଦୀ ପାଇଁ ଭାରତର ନୀତି ଏବଂ ପ୍ରାଥମିକତାକୁ ମାର୍ଗଦର୍ଶନ କରି ଚାଲିବ।