ନୂଆଦିଲ୍ଲୀ : ତିନୋଟି କୃଷି ଆଇନ ପ୍ରତ୍ୟାହାର ପାଇଁ ବିଲ୍ ଲୋକସଭାରେ ପାରିତ ହୋଇଯାଇଛି । କେନ୍ଦ୍ର କୃଷି ମନ୍ତ୍ରୀ ନରେନ୍ଦ୍ର ସିଂ ତୋମାର ଏହି ବିଲ୍ ଆଗତ କରିଛନ୍ତି ଯାହା ବିନା ଆଲୋଚନାରେ ପାରିତ ହୋଇଛି । ଏହି ପରି ଭାବରେ, କୃଷି ଆଇନ ପ୍ରତ୍ୟାହାରକୁ ନେଇ ସରକାର ସାମ୍ବିଧାନିକ ପ୍ରକ୍ରିୟା ଅଧୀନରେ ପ୍ରଥମ ପଦକ୍ଷେପ ନେଇଛନ୍ତି । ତେବେ ଘାଜିପୁର ସୀମାରେ ଆନ୍ଦୋଳନ ଚଳାଇଥିବା ଭାରତୀୟ କିସାନ ୟୁନିଅନର ଆନ୍ଦୋଳନକାରୀମାନେ ଘରକୁ ଫେରିବାକୁ ମନା କରି ଦେଇଛନ୍ତି । ଆଇନ ପ୍ରତ୍ୟାହାର ପାଇଁ ବିଲକୁ ଲୋକସଭାର ଅନୁମୋଦନ ସମ୍ପର୍କରେ ବି.କେ.ୟୁ ମୁଖପାତ୍ର ରାକେଶ ଟିକାୟତ କହିଛନ୍ତି ଯେ ଏହା ହେବା ଆବଶ୍ୟକ । କିନ୍ତୁ ଆନ୍ଦୋଳନକୁ ସମାପ୍ତ କରିବାର ପ୍ରଶ୍ନ ଉଠୁନାହିଁ । ଆନ୍ଦୋଳନ ଜାରି ରହିବ ବୋଲି ରାକେଶ ଟିକାୟତ କହିଛନ୍ତି ।
ସେ କହିଛନ୍ତି ଯେ ଏମଏସପି ଅଧିନିୟମ ସମେତ ଅନ୍ୟାନ୍ୟ ଅନେକ ବିଷୟ ବର୍ତ୍ତମାନ ଆଲୋଚନା ହେବା ଆବଶ୍ୟକ ଏବଂ ସରକାର ସେମାନଙ୍କ ଉପରେ ଆଲୋଚନା ନକରିବା ପର୍ଯ୍ୟନ୍ତ ଆମେ ଆନ୍ଦୋଳନ ଶେଷ କରିବୁ ନାହିଁ । ରାକେଶ ଟିକାୟତ ସ୍ପଷ୍ଟ ଭାବେ କହିଛନ୍ତି ଯେ ଏହି ଆନ୍ଦୋଳନ ଜାରି ରହିବ ଏବଂ ଏହାକୁ ଶେଷ କରାଯିବ କି ନାହିଁ, ଡିସେମ୍ବର ୪ ହେବାକୁ ଥିବା ବୈଠକରେ ନିଷ୍ପତ୍ତି ନିଆଯିବ ।