ଭୁବନେଶ୍ୱର: ଶଙ୍ଖ ଧରିଛନ୍ତି ଯୁବନେତା ବିଶ୍ୱରଞ୍ଜନ ମଲ୍ଲିକ । ବିଜେଡି କାର୍ଯ୍ୟାଳୟରେ ବରୀର ବିଶ୍ୱରଞ୍ଜନ ମଲ୍ଲିକ ଆଜି ବିଧିବଦ୍ଧ ଭାବେ ବିଜେଡିରେ ସାମିଲ ହୋଇଛନ୍ତି । ସେ ଶତାଧିକ ସମର୍ଥକଙ୍କ ଉପସ୍ଥିତିରେ ବିଜେଡିରେ ସାମିଲ ହୋଇଛନ୍ତି । ଏହି ମିଶ୍ରଣ ପର୍ବରେ ବିଜେଡିର ସାଙ୍ଗଠନିକ ସମ୍ପାଦକ ପ୍ରଣବ ପ୍ରକାଶ ଦାସ, ବରୀ ବିଧାୟିକା ସୁନନ୍ଦା ଦାଶ ଓ ଯାଜପୁରର ଅନ୍ୟ ନେତାଙ୍କ ଉପସ୍ଥିତ ଥିଲେ । ଏହି ଅବସରରେ ଶ୍ରୀ ମଲ୍ଲିକ କହିଛନ୍ତି ବରୀର ବିକାଶ ଓ ନବୀନଙ୍କ ବିକାଶଧାରାକୁ ଆଗେଇ ନେବାକୁ ମୁଁ ବିଜେଡିରେ ସାମିଲ ହୋଇଛି । ବିଶ୍ୱରଞ୍ଜନଙ୍କ ସହ ବରୀ ବ୍ଲକ ଅଧ୍ୟକ୍ଷ, ଉପାଧ୍ୟକ୍ଷ, ଜିଲ୍ଲାପରିଷଦ ସଦସ୍ୟ ଓ ସରପଞ୍ଚ ଏବଂ ପୂର୍ବତନ ସରପଞ୍ଚ ମଧ୍ୟ ବିଜେଡିରେ ଯୋଗ ଦେଇଛନ୍ତି । କିଛି ଦିନ ପୂର୍ବରୁ ସେ ବିଜେପି ଛାଡିଥିଲେ । ବିଜେପିରେ ରହି ଓଡିଶାର ବିକାଶ ସମ୍ଭବ ନୁହେଁ ବୋଲି କହିଥିଲେ ବିଶ୍ୱରଞ୍ଜନ । ତେବେ ବରୀ ଅଞ୍ଚଳରେ ଗମନାଗମନ, ମେଡିକାଲର ବିକାଶ, କଲେଜର ବିକାଶ ଓ ରତ୍ନଗିରିର ବିକାଶ ପାଇଁ ପ୍ରତିଶ୍ରୁତି ମିଳିବା ପରେ ସେ ବିଜେଡିରେ ସାମିଲ ହୋଇଥିବା କହିଛନ୍ତି ।
ବିଜେପି ଛାଡିବାର ୩ଟି କାରଣ ଥିବା ସେ କହିଛନ୍ତି । କେନ୍ଦ୍ରରେ ସରକାର ସତ୍ତେ୍ୱ ବରୀର ବିକାଶ କଲାନି ବିଜେପି । ୨୦୧୯ରେ ଦଳରେ ଗୋଷ୍ଠୀବାଦ ହେଲା । ବରୀରେ ମୁସଲମାନ ସମ୍ପ୍ରଦାୟ ଭୋଟ୍ ଦେଲେନି । ଏଥିପାଇଁ ବିଜେପି ଛାଡିଥିବା ସେ କହିଛନ୍ତି । ୨୦୧୪ରେ ସ୍ୱାଧୀନ ଭାବେ ସେ ବିଧାନସଭା ନିର୍ବାଚନ ଲଢିଥିଲେ । ୨୦୧୭ରେ ବିଜେପିରେ ସାମିଲ ହୋଇ ୨୦୧୯ରେ ବିଜେପିରୁ ବରୀ ବିଧାୟକ ପ୍ରାର୍ଥୀ ହୋଇଥିଲେ ।