ମୁମ୍ବାଇ : ଲକ୍ଷ୍ନୌ ସୁପର ଜଏଣ୍ଟସ୍ ଅଧିନାୟକ କେ.ଏଲ୍ ରାହୁଲ କୋଲକାତା ନାଇଟ୍ ରାଇଡର୍ସ ବିପକ୍ଷ ମ୍ୟାଚ୍ ପରେ ଭଲ ନିଶ୍ୱାସ ପ୍ରଶ୍ୱାସ ନେଇଥିବେ ନିଶ୍ଚିତ । କାରଣ ଏହି ବିଜୟ ସହିତ ଲକ୍ଷ୍ନୌ ସୁପର ଜଏଣ୍ଟସ୍ ପ୍ଲେ ଅଫ୍ରେ ପହଞ୍ଚିବାରେ ଦ୍ୱିତୀୟ ଦଳ ହୋଇପାରିଛି । ବର୍ତ୍ତମାନ ଅବଶିଷ୍ଟ ଦୁଇଟି ସ୍ଥାନ ପାଇଁ ପାଞ୍ଚଟି ଦଳ ମଧ୍ୟରେ ତୀବ୍ର ପ୍ରତିଯୋଗିତା ହେବ । ଚେନ୍ନାଇ ସୁପର କିଙ୍ଗ୍ସ ଏବଂ ମୁମ୍ବାଇ ଇଣ୍ଡିଆନ୍ସ ପ୍ଲେ ଅଫ୍ ଦୌଡ଼ରୁ ବାଦ ପଡିଥିଲେ ମଧ୍ୟ ଅନ୍ୟ ଦଳ ମାନଙ୍କର ଖେଳ ବିଗାଡିପାରନ୍ତି । ଗତକାଲିର ଏହି ରୋମାଞ୍ଚକର ବିଜୟ ପରେ କେ.ଏଲ୍ ରାହୁଲ ମଜାରେ କହିଛନ୍ତି ଯେ ମୋତେ ଏହି ମ୍ୟାଚ୍ ପାଇଁ ଅତିରିକ୍ତ ଟଙ୍କା ମିଳିବା ଉଚିତ୍ ।
ମ୍ୟାଚ୍ ପରେ ରାହୁଲ କହିଛନ୍ତି, ‘ବୋଧହୁଏ ମୋତେ ଏହି ଭଳି ମ୍ୟାଚ୍ ପାଇଁ ଅଧିକ ଟଙ୍କା ମିଳିବା ଉଚିତ୍ । ଏହି ସିଜିନରେ ଏମିତି ମ୍ୟାଚ୍ ଆମେ ବହୁତ ହାରିଛୁ । ସିଜିନରେ ଏପରି ମ୍ୟାଚ୍ କ୍ୱିଚିତ ଦେଖିବାକୁ ମିଳିଛି । ଯାହା ଶେଷ ବଲରେ ମ୍ୟାଚର ଫଳାଫଳ ଆସିଛି । ଖୁସି ଯେ ଆମେ ଏହି ମ୍ୟାଚ୍ ଜିତିବାରେ ସକ୍ଷମ ହୋଇଛୁ । ଆମେ ଏହି ମ୍ୟାଚ୍ ହାରୁ ହାରୁ ଜିତି ଯାଉଛି ବୋଲି ସେ କହିଛନ୍ତି ।
ରାହୁଲ ଆହୁରି କହିଛନ୍ତି, ଏହିପରି ଲିଗର ଶେଷ ମ୍ୟାଚ୍ ଜିତିବା ଭଲ ଥିଲା । କ୍ରେଡିଟ୍ ଉଭୟ ଦଳକୁ ଯିବ । କାରଣ ଉଭୟ ଦଳର ଖେଳାଳି ଭଲ ଖେଳିଥିଲେ । ମୁଁ ଭାବୁଛି ଆମେ ଭଲ ଥିଲୁ, କାରଣର ଶେଷ ଦୁଇଟି ବଲରେ ତିନି ଆବଶ୍ୟକ ଥିଲେ ହେଁ ଆମେ ମ୍ୟାଚ ଜିତିବାରେ ସକ୍ଷମ ହୋଇଥିଲୁ । ସେ କହିଛନ୍ତି ଲୁଇସଙ୍କ ସେହି କ୍ୟାଚ ଉଚ୍ଚକୋଟୀ ଥିଲ । ଗତ କିଛି ମ୍ୟାଚ୍ରେ ମୋହସିନ୍ ଖାନ୍ ଆମ ପାଇଁ ଏକ ଭଲ ଖେଳ ପ୍ରଦର୍ଶନ କରିଛନ୍ତି, ସେ ଯେପରି ଖେଳୁଛନ୍ତି, ଖୁବ୍ ଶୀଘ୍ର ତାଙ୍କୁ ଟିମ୍ ଇଣ୍ଡିଆ ପାଇଁ ଖେଳୁଥିବାର ଦେଖିବାକୁ ମିଳିବ ବୋଲି ଟିମ୍ ଇଣ୍ଡିଆର ଉପ ଅଧିନାୟକ କେଏଲ ରାହୁଲ କହିଛନ୍ତି ।