ଚଣ୍ଡିଗଡ : ଭାରତୀୟ ଦଳର ପୂର୍ଣ୍ଣକାଳୀନ ଅଧିନାୟକ ରୋହିତ ଶର୍ମା ପୂର୍ବତନ ଅଧିନାୟକ ବିରାଟ କୋହଲିଙ୍କ ୧୦୦ ତମ ଟେଷ୍ଟ ମ୍ୟାଚ୍ ପୂର୍ବରୁ ତାଙ୍କୁ ଉଚ୍ଚ ପ୍ରଶଂସା କରିଛନ୍ତି । ଶ୍ରୀଲଙ୍କା ବିପକ୍ଷ ପ୍ରଥମ ଟେଷ୍ଟ ପୂର୍ବରୁ ରୋହିତ ଏକ ସାମ୍ବାଦିକ ସମ୍ମିଳନୀରେ କହିଛନ୍ତି ଯେ ଦଳକୁ ଏହି ଫର୍ମାଟରେ ଭଲ ସ୍ଥିତିରେ ରଖିବାର ଶ୍ରେୟ ବିରାଟ କୋହଲିଙ୍କୁ ଦିଆଯିବ । ଶୁକ୍ରବାର ଠାରୁ ଆରମ୍ଭ ହୋଇଥିବା ପ୍ରଥମ ଟେଷ୍ଟରେ ରୋହିତ ଶ୍ରୀଲଙ୍କା ବିପକ୍ଷରେ ଟେଷ୍ଟ ଅଧିନାୟକତ୍ୱ ଆରମ୍ଭ କରିବେ ।
ମ୍ୟାଚ ପୂର୍ବରୁ ରୋହିତ ଏକ ସାମ୍ବାଦିକ ସମ୍ମିଳନୀରେ କହିଛନ୍ତି, “ଆମେ ଏକ ଟେଷ୍ଟ ଦଳ ଭାବେ ଭଲ ସ୍ଥିତିରେ ଅଛୁ । ଦଳର ଏହି ସ୍ଥିତି ପାଇଁ ସମସ୍ତ କ୍ରେଡିଟ୍ର ହକଦାର ବିରାଟ ବୋଲି ସେ କହିଛନ୍ତି । ସେ ଛାଡିଥିବା ସ୍ଥାନରୁ ମୁଁ ଏହାକୁ ଆଗକୁ ନେଇଯିବି ବୋଲି ମଧ୍ୟ ରୋହିତ କହିଛନ୍ତି ।
୧୦୦ ତମ ଟେଷ୍ଟ ମ୍ୟାଚ୍ ସମ୍ପର୍କରେ ବିରାଟ କୋହଲି ନିଜର ପ୍ରତିକ୍ରିୟା ଦେଇଛନ୍ତି । ପ୍ରଥମ ଟେଷ୍ଟ ମ୍ୟାଚ୍ ପୂର୍ବରୁ ବିସିସିଆଇ ଦ୍ୱାରା ସେୟାର କରାଯାଇଥିବା ଏକ ଭିଡିଓରେ ବିରାଟ କୋହଲି କହିଛନ୍ତି, “ସତ କହିବାକୁ ଗଲେ ମୁଁ କେବେ ଭାବି ନଥିଲି ଯେ ମୁଁ ୧୦୦ ଟେଷ୍ଟ ମ୍ୟାଚ୍ ଖେଳିବି । ଏହା ଏକ ଦୀର୍ଘ ଯାତ୍ରା ଅଟେ । ମୁଁ ୧୦୦ତମ ଟେଷ୍ଟ ମ୍ୟାଚ୍ ଖେଳିବାକୁ ଯାଉଥିବାରୁ ମୁଁ କୃତଜ୍ଞ । ଭଗବାନଙ୍କ ଆଶୀର୍ବାଦ ଯୋଗୁଁ ଏହା ସମ୍ଭବ ବୋଲି ସେ କହିଛନ୍ତି । ମୁଁ ଫିଟନେସ୍ ଉପରେ ବହୁତ କାମ କରିଛି । ଏହା ମୋ ଏବଂ ମୋ ପରିବାର ପାଇଁ ଏକ ବଡ଼ ମୁହୂର୍ତ୍ତ । ମୋର କୋଚ୍ ମଧ୍ୟ ବହୁତ ଖୁସି ଏବଂ ଗର୍ବିତ ଅନୁଭବ କରୁଛନ୍ତି ।