ପୁରୀ : ପୁରୀରେ ଅଲ ଓଡିଶା କବାଡି ଚମ୍ପିୟାନସିପ ଉଦଘାଟିତ ହୋଇଯାଇଛି । ବ୍ଲୁ ଫ୍ଲାଗ ବିଚରେ ଏହି ରାଜ୍ୟ ସ୍ତରୀୟ ଚମ୍ପିୟାନସିପ ୩ ଦିନ ଧରି ଅନୁଷ୍ଠିତ ହେବ । ଆସନ୍ତା ୩ ତାରିଖରେ ଫାଇନାଲ ମ୍ୟାଚ ଅନୁଷ୍ଠିତ ହେବ । ପ୍ରଥମେ ଲିଗ ପରେ ନକ ଆଉଟ ମ୍ୟାଚ ପରେ ସେମି ଫାଇନାଲ୍ ଓ ଫାଇନାଲ୍ ମ୍ୟାଚ ହେବ । ପୁରୀ ଜିଲାପାଳ ସମର୍ଥ ବର୍ମା ମୁଖ୍ୟ ଅତିଥି ଭାବେ ଯୋଗ ଦେଇ କାର୍ଯ୍ୟକ୍ରମକୁ ଉଦଘାଟନ କରିଥିଲେ । ଓଡିଶା କବାଡି ଆସୋସିଏସନ, ପୁରୀ ଜିଲ୍ଲା କ୍ରୀଡା ବିଭାଗର ମିଳିତ ଅନୁକୂଲ୍ୟରେ ଏହି ରାଜ୍ୟସ୍ତରୀୟ ଚମ୍ପିୟାନସିପ ଅନୁଷ୍ଠିତ ହେଉଛି ।
ଉଭୟ ପୁରୁଷ ଓ ମହିଳା ଟିମ ଏଥିରେ ଭାବ ନେଇଥିବା ବେଳେ ଓଡ଼ିଶାର ଶ୍ରେଷ୍ଠ ୮ ଟି ଦଳ ଉଭୟ ପୁରୁଷ ଓ ମହିଳା ବର୍ଗରେ ସାମିଲ ହୋଇଛନ୍ତି । ସେପଟେ ଓଡିଶା ସରକାର ଯେଭଳି କ୍ରୀଡାକୁ ରାଜ୍ୟରେ ପ୍ରଚାର ପ୍ରସାର ଦିଗରେ ଗୁରୁତ୍ୱ ଦେଉଛନ୍ତି ଏହା ଦ୍ୱାରା ରାଜ୍ୟରୁ ଅନେକ କ୍ରୀଡା ପ୍ରତିଭା ଆଗାମୀ ଦିନରେ ବାହାରି ରାଜ୍ୟର ଗୌରବ ରଖିବେ ବୋଲି ପୁରୀ ଜିଲ୍ଲା କ୍ରୀଡା ସଂସଦ କହିଛି । କବାଡି ଖେଳ ପୁରୀରେ ବେଶ ଲୋକପ୍ରିୟ ଥିବାରୁ ଏହି ରାଜ୍ୟ ସ୍ତରୀୟ କବାଡି ଚମ୍ପିୟାନସିପ ଆଗାମୀ ଦିନରେ ପୁରୀରେ କବାଡି ଖେଳକୁ ଆହୁରି ଆଗକୁ ନେବ ବୋଲି ପୁରୀ ଜିଲାପାଳ ସମର୍ଥ ବର୍ମା ଆଶା ପ୍ରକାଶ କରିଛନ୍ତି ।