ମ୍ବାଇ : ମୋ ମତରେ ବର୍ତ୍ତମାନ ସମୟରେ ଭାରତୀୟ କ୍ରିକେଟରେ ରବୀନ୍ଦ୍ର ଜାଡ଼େଜା ସବୁଠୁ ଶ୍ରେଷ୍ଠ ଫିଲ୍ଡର । ଭାରତର ଫିଲ୍ଡିଂ ବିଭାଗକୁ ସୁଦୃଢ଼ କରିବାରେ ତାଙ୍କର ଉଲ୍ଲେଖନୀୟ ଅବଦାନ ରହିଛି । ଏଭଳି ମତ ଦେଇଛନ୍ତି ଫିଲ୍ଡିଂ କୋଚ୍ ଆର୍ ଶ୍ରୀଧର । ଏପରିକି ଅଧିନାୟକ ବିରାଟ କୋହଲି ମଧ୍ୟ ଅନୁରୂପ ମତ ଦେଇଛନ୍ତି । ଅନ୍ଲାଇନରେ ଏହି ପ୍ରସଙ୍ଗକୁ ନେଇ ଏକ ବିତର୍କ ହୋଇଥିଲା । ବ ର୍ତ୍ତମାନ ସମୟରେ ଭାରତର ଶ୍ରେଷ୍ଠ ଫିଲ୍ଡର କିଏ ସେ ନେଇ ପ୍ରଶ୍ନ କରାଯାଇଥିଲା । ଶ୍ରୀଧର କହିଥିଲେ ଭାରତର ଫିଲ୍ଡିଂ ବିଭାଗକୁ ସୁଦୃଢ଼ କରିବାରେ ଯେଉଁମାନଙ୍କର ବିଶେଷ ଅବଦାନ ରହିଛି, ସେମାନଙ୍କ ମଧ୍ୟରେ କୋହଲି, ଯୁବରାଜ ସିଂ ଓ ରବୀନ୍ଦ୍ର ଜାଡ଼େଜା ଅନ୍ତର୍ଭୁକ୍ତ । ଯବୁରାଜ ଜଣେ ସଂକଳ୍ପବଦ୍ଧ ଫିଲ୍ଡର । କୋହଲି ମଧ୍ୟ ଭାରତର କ୍ଷେତ୍ର ରକ୍ଷା ପାଇଁ ଅନେକ ସମୟରେ ପ୍ରଭାବୀ ପ୍ରଦର୍ଶନ କରିଛନ୍ତି । ମହେନ୍ଦ୍ର ସିଂ ଧୋନି ମଧ୍ୟ ଭଲ ଫିଲ୍ଡିଂ କରିଥିବାର ନଜିର ରହିଛି ବୋଲି ସେ କହିଛନ୍ତି । ତେବେ କୋହଲିଙ୍କୁ ପଚରାଯିବାରୁ ସେ କହିଥିଲେ ଯେ, ମୋ ମତରେ ଜାଡ଼େଜା ଶ୍ରେଷ୍ଠ ଫିଲ୍ଡର । ବିଶେଷ କରି ଭାରତୀୟ କ୍ରିକେଟର ବର୍ତ୍ତମାନ ସମୟରେ ତାଙ୍କୁ ଜଣେ ଶ୍ରେଷ୍ଠ ଫିଲ୍ଡର ବୋଲି କୁହାଯାଇପାରେ । ଷ୍ଟାର ସ୍ପୋର୍ଟସ୍ର ଅଫିସିଆଲ୍ ଇନଷ୍ଟାଗ୍ରାମ ଏହି ପ୍ରସଙ୍ଗ ଉପରେ କ୍ରିକେଟ୍ ପ୍ରେମୀମାନଙ୍କ ମତାମତ ଲୋଡ଼ିଥିଲା । କୋହଲି ଓ ଜାଡ଼େଜାଙ୍କ ମଧ୍ୟରୁ କିଏ ଶ୍ରେଷ୍ଠ ଫିଲ୍ଡର ସେ ନେଇ ସେମାନଙ୍କୁ ପ୍ରଶ୍ନ କରାଯାଇଥିଲା । ସେମାନଙ୍କ ମଧ୍ୟରୁ ଅଧିକ ଲୋକ ଜାଡେଜାଙ୍କୁ ପସନ୍ଦ କରିଥିଲେ ।