ନୂଆଦିଲ୍ଲୀ : ଟିମ୍ ଇଣ୍ଡିଆ ବର୍ତ୍ତମାନ ଚମତ୍କାର ଲୟରେ ରହିଛି । ଦଳ ଲର୍ଡ୍ସ ଟେଷ୍ଟ ଜିତି ନିଜର ଆତ୍ମ ବିଶ୍ୱାସ ବଢାଇଛି । ପ୍ରଥମ ଟେଷ୍ଟରେ ମଧ୍ୟ ଭାରତ ବିଜୟ ଦ୍ୱାରରେ ପହଞ୍ଚିଥିଲା, କିନ୍ତୁ ବର୍ଷା ସବୁ ବିଗାଡି ଦେଇଥିଲା । ଶେଷ ଦିନରେ ବର୍ଷା ହେବାରୁ ଖେଳ ହୋଇପାରିନଥିଲା, ଶେଷରେ ଟେଷ୍ଟ ଡ୍ରରେ ସମାପ୍ତ ହୋଇଥିଲା । ଗତ ଦୁଇଟି ଟେଷ୍ଟ ମ୍ୟାଚରେ ଆର ଅଶ୍ୱିନଙ୍କୁ ଭାରତୀୟ ଏକାଦଶ ଖେଳିବାରେ ସୁଯୋଗ ଦିଆଯାଇ ନାହିଁ । ରବିନ୍ଦ୍ର ଜାଡେଜାଙ୍କୁ ଉଭୟ ମ୍ୟାଚ୍ରେ ଦଳର ସ୍ପିନ୍ ଅଲରାଉଣ୍ଡର ଭାବରେ ସୁଯୋଗ ଦିଆଯାଇଥିଲା, କିନ୍ତୁ ଦଳର ଫାଷ୍ଟ ବୋଲରଙ୍କ ଦ୍ୱାରା ସମସ୍ତ କାର୍ଯ୍ୟ ହୋଇଥିବାରୁ ସେ ଫିକା ପଡିଯାଇଥିଲେ । ପ୍ରଥମ ଦୁଇଟି ଟେଷ୍ଟରେ ଅଶ୍ୱିନଙ୍କୁ ଅନ୍ତର୍ଭୁକ୍ତ ନକରିବା ପରେ ଅନେକ କ୍ରିକେଟ୍ ବିଶେଷଜ୍ଞ ଏହାକୁ ବିରୋଧ କରି କହିଛନ୍ତି ଯେ ସେ ଦଳରେ ରହିବା ଉଚିତ୍ ।
ଭାରତ ବର୍ତ୍ତମାନ ଅଗଷ୍ଟ ୨୫ ରୁ ଲିଡ୍ସରେ ଇଂଲଣ୍ଡ ବିପକ୍ଷରେ ତୃତୀୟ ଟେଷ୍ଟ ଖେଳିବ । ଏହି ପୂର୍ବରୁ ପୂର୍ବତନ ଭାରତୀୟ ବ୍ୟାଟ୍ସମ୍ୟାନ୍ ତଥା ସମୀକ୍ଷକ ଆକାଶ ଚୋପ୍ରା ଏହି ଟେଷ୍ଟରେ ଆର ଅଶ୍ୱିନଙ୍କୁ ସୁଯୋଗ ମିଳିବା ଉଚିତ କି ନାହିଁ ସେ ସମ୍ପର୍କରେ ମତ ଦେଇଛନ୍ତି । ଆକାଶ ଚୋପ୍ରା କହିଛନ୍ତି ଯେ, ଏହି ପିଚ୍ରେ ମଧ୍ୟ ସ୍ପିନରଙ୍କୁ କୌଣସି ସଫଳତା ମିଳିବ ନାହିଁ ତେଣୁ ଅଶ୍ୱିନଙ୍କୁ ପୁଣିଥରେ ବେଞ୍ଚରେ ବସିବାକୁ ପଡିବ । ସେ କହିଛନ୍ତି ଉଭୟ ଟେଷ୍ଟ ମ୍ୟାଚରେ ଭାରତର ବୋଲିଂ ଖୁବ ପ୍ରଭାବଶାଳୀ ହୋଇଛି । ବିଶେଷ ଭାବରେ ସିରାଜ ନିଜର ଶକ୍ତି ପ୍ରଦର୍ଶନ କରି ସମସ୍ତଙ୍କ ମନ ଜିଣିଛନ୍ତି ।
ଆକାଶ ଚୋପ୍ରା ତାଙ୍କ ୟୁଟ୍ୟୁବ୍ ଚ୍ୟାନେଲରେ କହିଛନ୍ତି ଯେ ଆର ଅଶ୍ୱିନ୍ ଲିଡ୍ସରେ ଖେଳିବାର କୌଣସି ସମ୍ଭାବନା ନାହିଁ । ଲର୍ଡ୍ସ ଟେଷ୍ଟରେ ଅଶ୍ୱିନଙ୍କର ଖେଳିବାର ସୁଯୋଗ ଥିଲା କିନ୍ତୁ ସେ ଦଳରେ ସାମିଲ ହୋଇପାରିନଥିଲେ । ଲିଡ୍ସରେ ସ୍ପିନରମାନଙ୍କର ଆବଶ୍ୟକତା ନାହିଁ । ଏହା ବ୍ୟତୀତ ଭାରତୀୟ ଦ୍ରୁତ ବୋଲରଙ୍କ ସଫଳତା ଇଂଲଣ୍ଡ ଦଳରେ ଭୟ ସୃଷ୍ଟି କରିଛି । ଅନ୍ୟପକ୍ଷରେ ଜାଡେଜାଙ୍କ ବିଷୟରେ ସେ କହିଛନ୍ତି ଯେ ଅବଶ୍ୟ ସେ ପ୍ରଥମ ଦୁଇଟି ମ୍ୟାଚରେ ୱିକେଟ୍ ନେଇ ନାହାଁନ୍ତି, କିନ୍ତୁ ଏହା ଭାରତ ପାଇଁ ଅଧିକ କ୍ଷତି କରିନାହିଁ । ଯଦି ଜାଡେଜା ୱିକେଟ୍ ନେଉନାହାଁନ୍ତି ତେବେ ଭାରତ ପାଇଁ କୌଣସି ପରିବର୍ତ୍ତନ ଆଣିବ ନାହିଁ, ତେବେ ଆପଣ ଅଶ୍ୱିନଙ୍କୁ କେଉଁଠାରେ ରଖିବେ ବୋଲି ସେ କହିଛନ୍ତି ।