ଧର୍ମଶାଳା : ଆସନ୍ତାକାଲି ଶ୍ରୀଲଙ୍କା ବିପକ୍ଷ ଦ୍ୱିତୀୟ ଟି-୨୦ ଧର୍ମଶାଳାରେ ଭାରତ ଖେଳିବ । ଏହା ପୂର୍ବରୁ ଉଭୟ ଦଳ ସେଠାରେ ପହଞ୍ଚି ଅଭ୍ୟାସ ଆରମ୍ଭ କରିଛନ୍ତି । ପ୍ରଥମ ମ୍ୟାଚରେ ଭାରତ ସହଜରେ ବିଜୟୀ ହୋଇଥିବାରୁ ଆସନ୍ତାକାଲିର ମ୍ୟାଚକୁ ଜିତି ସିରିଜ କବଜା କରିବାକୁ ନିହାତି ଚାହିଁବା ସେହିପରି ଶ୍ରୀଲଙ୍କା ଦଳ ମଧ୍ୟରେ ମ୍ୟାଚକୁ ଜିତି ଶୃଙ୍ଖଳାରେ ତିଷ୍ଠି ରହିବାକୁ ପ୍ରାଣମୂର୍ଚ୍ଛା ଉଦ୍ୟମ କରିବ । ଶ୍ରୀଲଙ୍କାର ଷ୍ଟାର ଅଲରାଉଣ୍ଡର ହସରଙ୍କା ସିରିଜରୁ ଆଉଟ୍ ହୋଇଥିବାରୁ ଶ୍ରୀଲଙ୍କାକୁ ଏହା ବଡ ଝଟକା ଦେଇଛି । ସେହିପରି ମିଷ୍ଟ୍ରି ସ୍ପିନର ମହିସ ମଧ୍ୟ ଏହି ସିରିଜରୁ ସଂପୂର୍ଣ୍ଣ ରୂପେ ବାଦ ପଡିଛନ୍ତି ।
ଗତ ବର୍ଷ ଶେଷ ହୋଇଥିବା ଟି-୨୦ ବିଶ୍ୱକପରେ ଭାରତ ପ୍ରଥମ ରାଉଣ୍ଡରୁ ବିଦାୟ ହେବା ପରେ ଦଳର ଆଭିମୁଖ୍ୟ ବଦଳାଇଛି । ଯୁବ ଖେଳାଳିଙ୍କୁ ସୁଯୋଗ ଦେଇଛି ଓ ବର୍ତ୍ତମାନ ଏକ ଭିନ୍ନ ଦଳ ପରି ଦେଖାଯାଉଛି ।
ଅକ୍ଟୋବର-ନଭେମ୍ବରରେ ଅଷ୍ଟ୍ରେଲିଆରେ ହେବାକୁ ଥିବା ଟି -୨୦ ବିଶ୍ୱକପ ପାଇଁ ସମୟ ଅଛି, କିନ୍ତୁ ରୋହିତ ଶର୍ମାଙ୍କ ନେତୃତ୍ୱାଧୀନ ଦଳରେ ଏହି ଟୁର୍ନାମେଣ୍ଟରେ ଖେଳିବାକୁ ଖେଳାଳିଙ୍କୁ ଏବେଠୁ ପ୍ରସ୍ତୁତ କରୁଥିବା ଜଣାପଡିଛି ।
ପ୍ରଥମ ମ୍ୟାଚ୍ ପରେ ରୋହିତ ସୂଚାଇ ଦେଇଛନ୍ତି ଯେ ରବିନ୍ଦ୍ର ଜାଡେଜାଙ୍କ ବ୍ୟାଟିଂ ଟେକ୍ନିକର ଫାଇଦା ନେବାକୁ ଦଳ ଚାହୁଁଥିବାରୁ ତାଙ୍କୁ ଉପର କ୍ରମରେ ବ୍ୟାଟିଂ କରିବାକୁ ସୁଯୋଗ ମିଳିବ । ଏହି ସିରିଜରୁ ଦଳକୁ ଫେରିଥିବା ସଞ୍ଜୁ ସାମସନ ପ୍ରଥମ ମ୍ୟାଚରେ ବ୍ୟାଟିଂ କରିବାର ସୁଯୋଗ ପାଇ ନଥିଲେ ଏବଂ ଯଦି ସେ ଧର୍ମଶାଳାରେ ସୁଯୋଗ ପାଆନ୍ତି ତେବେ ସେ ଏହାର ଫାଇଦା ନେବାକୁ ନିହାତି ଚାହିଁବେ ।
ବୋଲିଂ ବିଭାଗରେ ମଧ୍ୟ ଭାରତ ଭଲ ପ୍ରଦର୍ଶନ କରୁଛି ଏବଂ ଗୁରୁବାର ଦୀପକ ହୁଡାଙ୍କ ସମେତ ସାତୋଟି ବିକଳ୍ପ ରଖଥିଲା । ଭେଙ୍କଟେଶ ଆୟର୍ ବ୍ୟୟବହୁଳ ସାବ୍ୟସ୍ତ ହୋଇଥିଲେ ମଧ୍ୟ ଦୁଇଟି ୱିକେଟ୍ ନେଇଥିଲେ । ଭୁବନେଶ୍ୱର କୁମାର ଏବଂ ଜସପ୍ରୀତ ବୁମ୍ରା ପୁଣି ଥରେ ଏକ ବଡ଼ ଦାୟିତ୍ୱ ଗ୍ରହଣ କରିବେ । ଭୁବି ପ୍ରଥମ ମ୍ୟାଚରେ ଦୁଇଟି ୱିକେଟ୍ ନେଇଥିଲେ । ବୁମରା ୱିକେଟ୍ ପାଇପାରିନଥିଲେ । ୟୁଜବେନ୍ଦ୍ର ଚହଲ ମଧ୍ୟ ଗୋଟିଏ ୱିକେଟ୍ ପାଇଥିଲେ ।
ଶ୍ରୀଲଙ୍କା ବିପକ୍ଷ ଦ୍ୱିତୀୟ ଟି-୨୦ପାଇଁ ଭାରତର ସମ୍ଭାବ୍ୟ ପ୍ଲେଇଙ୍ଗ ଏକାଦଶ
ଇଶାନ କିଶନ, ରୋହିତ ଶର୍ମା, ଶ୍ରେୟାସ ଆୟର, ସଞ୍ଜୁ ସାମସନ, ଭେଙ୍କଟେଶ ଆୟର, ରବିନ୍ଦ୍ର ଜାଡେଜା, ଜସପ୍ରୀତ ବୁମ୍ରା, ଦୀପକ ହୁଡା, ଭୁବନେଶ୍ୱର କୁମାର, ରବି ବିଷ୍ଣୋଇ, ୟୁଜବେନ୍ଦ୍ର ଚହଲ