ପାଟନା : ବିହାରରୁ ସଡ଼କ ଦୁର୍ଘଟଣାର ଏକ ବଡ ଖବର ସାମ୍ନାକୁ ଆସିଛି । ବୈଶାଲୀ ଜିଲ୍ଲାରେ ରବିବାର ସଂଧ୍ୟାରେ ମହନାର-ହାଜିପୁର ମୁଖ୍ୟ ରାସ୍ତାର ଦେସରୀ ଥାନା ଅନ୍ତର୍ଗତ ସୁଲ୍ତାନପୁର ୨୮ ଟୋଲ ନିକଟରେ ଏକ ଦ୍ରୁତ ଗତିରେ ଆସୁଥିବା ଏକ ଟ୍ରକ ୧୫ଜଣଙ୍କ ଉପରେ ମାଡି ଯାଇଛି । ଏହି ମର୍ମନ୍ତୁଦ ଦୁର୍ଘଟଣାରେ ଏ ପର୍ଯ୍ୟନ୍ତ ୧୦ଜଣଙ୍କ ମୃତ୍ୟୁ ହୋଇଥିବା ଜଣାପଡିଛି । କେତେକ ଲୋକ ଟ୍ରେକ ଚକା ତଳେ ଚାପି ହୋଇଯାଇଥିବା ମଧ୍ୟ ଖବର ସାମ୍ନାକୁ ଆସିଛି । ମୃତ୍ୟୁ ବରଣ କରିଥିବା ଅଧିକାଂଶ ଲୋକ ଏକ ବିବାହ ଉତ୍ସବରୁ ଭୋଜି ଖାଇ ଫେରୁଥିଲେ । ଦୁର୍ଘଟଣା ପରେ ଘଟଣାସ୍ଥଳରେ ବହୁ ସଂଖ୍ୟାରେ ଜନସମାଗମ ହୋଇଥିଲା । ପୋଲିସ ସୂଚନା ପାଇ ସ୍ଥାନୀୟ ଲୋକଙ୍କ ସହାୟତାରେ ଟ୍ରକ ତଳେ ପୋତି ହୋଇଥିବା ଲୋକଙ୍କୁ ବାହାରକୁ ଆଣିଛି । ଏଥିସହ ଏହି ଦୁର୍ଘଟଣାରେ ଆହତ ହୋଇଥିବା ଲୋକଙ୍କୁ ଶୀଘ୍ର ନିକଟସ୍ଥ ଡାକ୍ତରଖାନାରେ ଭର୍ତ୍ତି କରାଯାଇଛି ।