ହରଭଙ୍ଗା : ଜାତୀୟ ରାଜପଥ ନମ୍ବର୍ ୫୭ର ବୌଦ୍ଧ ଥାନା ରାମ୍ଭିକଟା ଗ୍ରାମ ନିର୍ମାଣାଧିନ ଟୋଲ ଗେଟ୍ ନିକଟରୁ ଗତକାଲି ଏକ ଗ୍ଲେମୋର୍ ବାଇକ୍ ସହ ଜବତ୍ ହୋଇଥିବା ୨୨ କେଜି ୧୦୦ ଗ୍ରାମ୍ ଗଂଜେଇ ଜବତ୍ ମାମଲାର ୩ ଅଭିଯୁକ୍ତଙ୍କୁ ବୌଦ୍ଧ ଥାନା ପୋଲିସ ଗିରଫ କରି କୋର୍ଟ ଚାଲାଣ କରିଛି । ମିଳିଥିବା ସୂଚନା ଅନୁଯାୟୀ ଗତକାଲି ସକାଳେ ହରେକୃଷ୍ଣପୁର ଅଂଚଳରୁ ରେଢାଖୋଲ ଅଂଚଳକୁ ଗଂଜେଇ ଚୋରାଚାଲାଣ ହେଉଥିବା ଖବର ପାଇ ରାମ୍ଭିକଟା ନିର୍ମାଣାଧିନ ଟୋଲ ଗେଟ୍ ନିକଟରେ ପୋଲିସ୍ ଟିମ୍ ଛପି ରହିଥିଲେ । ହରେକୃଷ୍ଣପୁର ପଟରୁ ବୌଦ୍ଧ ଆଡକୁ ଆସୁଥିବା ଗ୍ଲେମୋର୍ ବାଇକ୍OD 12 A 3520 କୁ ଅଟକାଇ ଯାଞ୍ଚ କରିବାରୁ ୨ଟି ଜରି ବ୍ୟାଗରେ ଗଂଜେଇ ଥିବା ଜଣା ପଡିଥିଲା । ମାଜିଷ୍ର୍ଟ୍ରେଟଙ୍କ ଉପସ୍ଥିତିରେ ଓଜନ କରିବାରୁ ୨୨ କେଜି ୧୦୦ ଗ୍ରାମ୍ ହୋଇଥିଲା । ବାଇକରେ ଥିବା ୩ ଜଣ ଯୁବକଙ୍କୁ ପୋଲିସ୍ ଗିରଫ କରି ଥାନାକୁ ଆଣି ପଚରାଉଚୁରା କରିଥିଲା । ଗିରଫ ୩ ଅଭିଯୁକ୍ତ ହରେକୃଷ୍ଣପୁର ଗ୍ରାମର ରଂଜନ ବେହେରା, ପୁରୁଣାକଟକ ଥାନା ଲଣ୍ଡରିଜୋର୍ ଗ୍ରାମର ସଞ୍ଜୟ ବେହେରା ଓ ଚାରିଛକ କାଠ ଡିପୋ ସାହିର ସଲମାନ ଖାନ୍କୁ ଆଜି କୋର୍ଟ ଚାଲାଣ କରାଯାଇଥିବା ବୌଦ୍ଧ ଆଦର୍ଶ ଥାନା ଅଧିକାରୀ ସୂଚନା ଦେଇଛନ୍ତି ।