ଘୁ.ଉଦୟଗିରି :- ସ୍ଥାନୀୟ ସହରର ସବୁଠାରୁ ଜନଗହଳିପୂର୍ଣ୍ଣ ଜାଗା ଗାନ୍ଧୀ ଛକଠାରୁ ମାତ୍ର କିଛି ମିଟର ଦୂର ଅବସ୍ଥିତ ବଡ଼ସାହିରୁ ୨୨ ତାରିଖ ରାତି ୧୨.୫୦ ମିନିଟ ସମୟରେ ଏକ ଯାତ୍ରୀବାହୀ ଅଟୋ ନମ୍ବର ଓ ଡି ୧୨ସି ୪୫୯୭ ଚୋରି ହୋଇଥିବା ଅଭିଯୋଗ ହୋଇଥିଲା । ପ୍ରାପ୍ତ ସୂଚନା ଅନୁସାରେ ଫୁଲବାଣୀରୁ ଆସିଥିବା ସାମନ୍ତ ବେହେରା ନିଜ ଅଟୋ ନେଇ ଭିଣୋଇ ଘରକୁ ଆସିଥିଲେ । ଭିଣୋଇ ଜିତୁ ସେଠୀଙ୍କ ଘର ସାମନା ରାସ୍ତାରେ ଅଟୋ ରଖି ରାତ୍ରି ବିଶ୍ରାମ ନେଇଥିଲେ । ଯାହାକୁ ରାତିରେ କିଛି ଦୁର୍ବୃତ୍ତ ଚୋରି କରିନେଇଥିବା ନେଇ ସ୍ଥାନୀୟ ଥାନାରେ ଅଟୋ ମାଲିକଙ୍କ ଲିଖିତ ଏତଲା ଅନୁଯାୟୀ ପୋଲିସ କେସ ନମ୍ବର ୧୨୬/୨୨ ଅନୁଯାୟୀ ଏ ଏସ ଆଇ ବୁଲୁ ବେହେରା ତଦନ୍ତ ଆରମ୍ଭ କରିଥିଲେ । ବିଭିନ୍ନ ସ୍ଥାନରେ ଥିବା ସିସି ଟିଭି ଫୁଟେଜ ଓ ପାରିପାର୍ଶିକ ସ୍ଥିତିକୁ ଅନୁଧ୍ୟାନ କରି ତଦନ୍ତ କରିଥିଲେ । ଶେଷରେ ବିଶ୍ୱସ୍ତ ସୂତ୍ରରୁ ଖବର ପାଇ ପାବୁରିଆ ନିକଟ ଏକ ନିର୍ଜନ ସ୍ଥାନରୁ ଅଟୋଟିକୁ ଜବତ କରିଥିଲେ । ଅଧିକ ତଦନ୍ତରୁ ପୋଲିସ ବିଭାଗ ଦ୍ୱାରା ସ୍ଥାନୀୟ ଅଞ୍ଚଳର ୪ ଜଣ ନାବାଳକଙ୍କୁ ଅଟକ ରଖି ପଚରାଉଚରା କରାଯାଇଥିଲା । ଫଳ ସ୍ୱରୂପ ଚୋରି କରିଥିବା ନାବାଳକ ମାନେ ନିଜ ଦୋଷ ସ୍ୱୀକାର କରିବା ସହ କିପରି ଚୋରି କରିଥିଲେ ତାହା ଘଟଣା ସ୍ଥଳକୁ ଯାଇ ଡେମୋ ଦେଖେଇବା ସହ ଘଟଣା କ୍ରମକୁ କହିଥିଲେ । ସୂଚନା ଅନୁସାରେ ପୋଲିସ ବିଭାଗ ଆବଶ୍ୟକ ଅନୁସାରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି କହିଛନ୍ତି ।