ପାଟଣାଗଡ / ଖପ୍ରାଖୋଲ: ବଲାଙ୍ଗିର ଜିଲା ପାଟଣାଗଡ଼ ଉପଖଣ୍ଡ ଖପ୍ରାଖୋଲ ବ୍ଲକ ଲାଠୋର ଥାନା ଲାଠୋର ଗ୍ରାମରେ ଜଣେ ଯୁବକଙ୍କୁ ତିନି ଜଣ ଯୁବକଙ୍କ ଦ୍ୱାରା ମରଣାନ୍ତକ ଆକ୍ରମଣ ଘଟଣା ଅଞ୍ଚଳରେ ଚାଞ୍ଚଲ୍ୟ ସୃଷ୍ଟି କରିଛି । ସୂଚନା ଅନୁସାରେ ଲାଠୋର ଗ୍ରାମର ତଲିପଡାରେ ରହୁଥିବା କମଲ ପାତ୍ରଙ୍କୁ ସେହି ପଡାର ତିନି ଜଣ ଯୁବକ ମାୟାଧର, କୁନ୍ତ, ବୁଲୁ ପୁର୍ବ ଶତ୍ରୁତାକୁ କେନ୍ଦ୍ରକରି ମରଣାନ୍ତକ ଆକ୍ରମଣ କରିଥିବା କମଲ ଗଣମାଧ୍ୟମ ଆଗରେ ଜଣାଇଛନ୍ତି । କମଲଙ୍କ କହିବା ମୁତାବକ ସନ୍ଧ୍ୟା ଆଠଟା ସମୟରେ କୌଣସି ଘଟଣାକୁ ନେଇ କମଲଙ୍କ ଭାଇଙ୍କ ସହିତ ଉକ୍ତ ଯୁବକମାନଙ୍କ ଝଗଡ଼ା ହେଉଥିଲା । ଏହା ଦେଖି କମଲ ଝଗଡା ବନ୍ଦ କରିବା ପାଇଁ ଚେଷ୍ଟା କରୁଥିବା ସମୟରେ ଯୁବକମାନେ ତାଙ୍କୁ ଟାଙ୍ଗୀଆରେ ମରଣାନ୍ତକ ଆକ୍ରମଣ କରିଥିଲେ । ଗୁରୁତର ଅବସ୍ଥାରେ କମଲ ଲାଠୋର ଥାନାକୁ ଅଭିଯୋଗ କରିବା ପାଇଁ ଯାଇଥିଲେ । ସେଠାରୁ ତାଙ୍କୁ ନିଜ ଚିକିତ୍ସା କରାଇବା ପାଇଁ କୁହାଯାଇଥିଲା । ସେଠାରୁ ଫେରିଆସି ସେ ପାଟଣାଗଡ଼ ଡ଼ାକ୍ତରଖାନାରେ ଚିକିତ୍ସିତ ହେଉଥିବା ଜଣାଇଛନ୍ତି । ତାଙ୍କୁ ଚିକିତ୍ସା କରୁଥିବା ଡାକ୍ତରଙ୍କ କହିବା ମୁତାବକ ତାଙ୍କର ଅବସ୍ଥା ଏବେ ଠିକ୍ ଥିବା ଜଣାପଡିଛି । ଖବର ଲେଖା ହେବା ପର୍ଯ୍ୟନ୍ତ ପାଟଣାଗଡ଼ ଡାକ୍ତରଖାନାରୁ କମଲ ଡିସଚାର୍ଜ ହୋଇ ନିଜ ଗାଁ ଲାଠୋରକୁ ଯାଇଥିବା ଜଣାପଡିଛି ।