ଦଶପଲ୍ଲା : ନିଖୋଜ ଦଣ୍ଡୁଆଙ୍କ ମୃତ ଦେହ ଠାବ ହୋଇଛି । ଘୁଘୁଡିପଡ଼ା ଆଲପଙ୍ଗା ଜଙ୍ଗଲରେ ଗଛରେ ଝୁଲନ୍ତା ଅବସ୍ଥାରେ ମୃତ ଦେହ ଠାବ ହୋଇଥିବା ଜଣାପଡିଛି । ମୃତ ଦଣ୍ଡୁଆ ଜଣକ କୃଷ୍ଣଚନ୍ଦ୍ରପୁରପାଟଣା ଗ୍ରାମର ବିଜୟ ନାହାକ ବୋଲି ସୂଚନା ମିଳିଛି । ମୃତ ବିଜୟ ଦୀର୍ଘ ୫ଦିନ ହେବ ନିଖୋଜ ଥିଲେ । ଘୁଘୁଡିପଡ଼ା ଗ୍ରାମକୁ ଦଣ୍ଡନାଚ କରିବାକୁ ଯାଇଥିବା ବେଳେ ହଠାତ ନିଖୋଜ ହୋଇଯାଇଥିଲେ । ଦଣ୍ଡୁଆ ଜଣକ ନିଖୋଜ ହୋଇ ଯିବା ପରେ ପରିବାର ଓ ଗ୍ରାମବାସୀ ବହୁ ଖୋଜା ଖୋଜି କରିଥିଲେ ମଧ୍ୟ ତାଙ୍କର କୌଣସି ପତ୍ତା ମିଳିନଥିଲା । ତେବେ ଗ୍ରାମବାସୀ ଓ ପରିବାର ଲୋକ ଆଜି ଘୁଘୁଡିପଡ଼ା ଠାରେ ପହଂଚି ଘୁଘୁଡିପଡ଼ା ଗ୍ରାମବାସୀଙ୍କ ସହ ବହୁ ସମୟ ଧରି ଆଲୋଚନା କରିଥିଲେ । ପରେ କିଛି ଲୋକ ଜଙ୍ଗଲରେ ଖୋଜାଖୋଜି କରିବା ପରେ ଏକ ଗଛରେ ଝୁଲନ୍ତା ଅବସ୍ଥାରେ ମୃତଦେହ ଠାବ ହୋଇଥିଲା । ତେବେ ଏହି ଘଟଣାକୁ ନେଇ ବିଭିନ୍ନ କଳ୍ପନାଜଳ୍ପନା ଲାଗିରହିଛି । ଘଟଣାସ୍ଥଳରେ ପୋଲିସ ପହଂଚି ତଦନ୍ତ ଜାରି ରଖିଛି ।