ପାରଳାଖେମୁଣ୍ଡି : ପାରଳାଖେମୁଣ୍ଡି ସହରରେ ସଡ଼କ ସୁରକ୍ଷା ପାଇଁ ସଚେତନତା ଶୋଭାଯାତ୍ରା ଆୟୋଜନ କରାଯାଇଛି । ଏହି ଶୋଭାଯାତ୍ରା ସହରର ଆଦର୍ଶ ଥାନା ସମ୍ମୁଖରୁ ଆରମ୍ଭ ହୋଇ ସହର ପରିକ୍ରମା କରିଥିଲା । ଏହି ଶୋଭାଯାତ୍ରାକୁ ଶୁଭାରମ୍ଭ କରିଥିଲେ ଆଞ୍ଚଳିକ ପରିବହନ ଅଧିକାରୀ ଶାନ୍ତନୁ କୁମାର ପରିଡ଼ା ଓ ଆଦର୍ଶ ଥାନା ଅଧିକାରୀ ବାବୁଲି ନାୟକ । ପରେ ପାରଳାଖେମୁଣ୍ଡି ସହରର ମୁଖ୍ୟ ରାସ୍ତାରେ ବିଦ୍ୟାଳୟ ଛାତ୍ର ଛାତ୍ରୀ ସଡ଼କ ସୁରକ୍ଷା ଜୀବନ ରକ୍ଷା ସ୍ଲୋଗାନ ଦେଇ ପରିଭ୍ରମଣ କରି ଲୋକଙ୍କୁ ବୁଝାଇବା ସହ ସଚେତନ କରାଇବା ପାଇଁ ପ୍ଲାକାର୍ଡ ଧରିଥିଲେ । ମୁଖ୍ୟତଃ ହେଲମେଟ ପରିଧାନ, ଦି ଚକିଆ ଯାନରେ ତିନି ଜଣ ନ ଯିବା, ନିଶା ପାନ କରି ଗାଡି ନ ଚଳାଇବା, ସିଟ ବେଲ୍ଟ ପରିଧାନ କରି ସୁରକ୍ଷିତ ଯାତ୍ରା କରିବାକୁ ସଚେତନ କରାଯାଇଛି । ଏହି ଶୋଭାଯାତ୍ରା ସମୟରେ ପୋଲିସ ପକ୍ଷରୁ ସୁରକ୍ଷା ପାଇଁ ବ୍ୟାପକ ପ୍ରସ୍ତୁତି ହୋଇଥିଲା ।