ଖଡ଼ିଆଳ: ନୂଆପଡ଼ା ଜିଲ୍ଲା ଖଡ଼ିଆଳ ଫରେଷ୍ଟ ରେଞ୍ଜ ଅନ୍ତର୍ଗତ ଘରଧରା ଗ୍ରାମ୍ୟ ଜଙ୍ଗଲରେ ନିଆଁ ଲାଗି ଯାଇଥିବା ବେଳେ ନିକଟରେ ଥିବା ଏକ ବଗିଚାର ପାଞ୍ଚ ଶହ ଗଛ ପୋଡି ନଷ୍ଟ ହୋଇ ଯାଇଥିବା ଅଭିଯୋଗ ହୋଇଛି । ସୂଚନା ମତେ ଆଜି ଦିନ ବାରଟା ସମୟରେ କେଉଁ ଦୁର୍ବୃତ୍ତ ଏହି ଜଙ୍ଗଲ ରେ ନିଆଁ ଲଗେଇ ଦେଇଥିଲା । ଫଳରେ ଜଙ୍ଗଲ ଜଳିବା ସହ ଜଙ୍ଗଲକୁ ଲାଗି ଘରଧରା ଗ୍ରାମର ପ୍ରକାଶ ବନ୍ଦୀଛୋରଙ୍କ ଫଳ ବଗିଚା ମଧ୍ୟ ଜଳି ଯାଇଛି । ସେ ନିଜ ଗୋଟିଏ ଏକର ଜମିରେ ପାଞ୍ଚଶହ ଆମ୍ବ ଓ ପଣସ ଗଛ ଲଗାଇ ପାଞ୍ଚ ବର୍ଷ ହେବ ରକ୍ଷଣାବେକ୍ଷଣ କରିଆସୁଥିଲେ । ଆଜି ହଠାତ ନିଜ ବଗିଚା ପୋଡ଼ିଯାଉଥିବାର ଦେଖିବାକୁ ପାଇ ସ୍ଥାନୀୟ ଲୋକଙ୍କୁ ଡାକି ନିଆଁ ଲିଭେଇବା ସହ ଦମକଳ କେନ୍ଦ୍ରକୁ ଫୋନ ମାଧ୍ୟମରେ ଯୋଗାଯୋଗ କରିଥିଲେ । ଦମକଳ ବାହିନୀ ଆସି ନିଆଁକୁ ଆୟତ୍ତ କରିଥିଲେ । ପାଞ୍ଚଶହ ଗଛରୁ ଅଧାଗଛ ପୋଡି ପାଉଁଶ ହୋଇ ଯାଇଥିବା ସେ ପ୍ରକାଶ କରିବା ସହ ଦୁର୍ବୃତ୍ତ ମାନଙ୍କ ବିରୋଧରେ କାର୍ଯ୍ୟାନୁଷ୍ଠାନ ନେବାକୁ ଦାବି କରିଛନ୍ତି ।