ଦଶପଲ୍ଲା : ନୟାଗଡ଼ ତଥା ଦଶପଲ୍ଲା ପୋଲିସ୍ର ନିଦ ହଜାଇ ଦେଇଥିବା ଦୁର୍ଦ୍ଦାନ୍ତ ଅପରାଧି ବିକାଶ ବେହେରା ଛୁରୀମାଡ଼ରେ ମୃତ୍ୟୁ ବରଣ କରିଛି । ଦଶପଲ୍ଲା ବ୍ଲକ୍ ଅନ୍ତର୍ଗତ ମଧ୍ୟଖଣ୍ଡ ଗ୍ରାମରେ ଦୀପାବଳୀ ଉତ୍ସବ ପାଳନ ଅବସରରେ ବାଣ ଫୁଟାଇବା ସମୟରେ ଦୁଇ ଗୋଷ୍ଠୀ ମଧ୍ୟରେ ବଚସା ଓ ପରେ ଗଣ୍ଡଗୋଳ ହୋଇଥିଲା । ଏହି ଗଣ୍ଡଗୋଳରେ ବିକାଶ ଉପରେ ଅତର୍କିତ ଭାବରେ ଛୁରି ମାଡ ହୋଇଥିଲା । ସଙ୍କଟାପନ୍ନ ଅବସ୍ଥାରେ ବିକାଶକୁ ପ୍ରଥମେ ଦଶପଲ୍ଲା ଓ ପରେ ନୟାଗଡ଼ ଜିଲ୍ଲା ମୁଖ୍ୟ ଚିକିତ୍ସାଳୟ ସ୍ଥାନାନ୍ତରିତ କରାଯାଇଥିଲା । ନୟାଗଡ଼ ଜିଲ୍ଲା ମୁଖ୍ୟ ଚିକିତ୍ସାଳୟରେ ଡାକ୍ତର ବିକାଶକୁ ମୃତ ଘୋଷଣା କରିଛନ୍ତି । ଟାଉନଥାନା ପୁଲିସ ବିକାଶର ମୃତଦେହ ଜବତ କରିବା ସହ ବ୍ୟବଚ୍ଛେଦ ପାଇଁ ପଠାଇଛି । ଏହି ଘଟଣାରେ ଦଶପଲ୍ଲା ପୁଲିସ ଦୁଇ ଜଣକୁ ଅଟକ ରଖିଥିବା ସୂଚନା ମିଳିଛି । ଦଶପଲ୍ଲା ଥାନା ଭିଏଲଡବ୍ଲୁ ଗୁଳିକାଣ୍ଡ ଓ ଡାକ୍ତରଙ୍କଠାରୁ ଲୁଟ ଘଟଣାର ବିକାଶ ମୁଖ୍ୟ ଅଭିଯୁକ୍ତ ଥିଲା । ପୂର୍ବରୁ ମଧ୍ୟ ବିକାଶ ଅନ୍ୟ ଗୋଷ୍ଠୀର ମରଣାନ୍ତକ ଆକ୍ରମଣର ଶିକାର ହୋଇଥିଲା ।