ବାଲିଗୁଡ଼ା: ବେଆଇନ୍ ଗଞ୍ଜେଇ ବୋଝେଇ କାର୍ ଜବତ କରିବାସହ ଜଣେ ଚାଲାଣକାରୀକୁ ଗିରଫ କରି କୋର୍ଟ ଚାଲାଣ କରିଛି କନ୍ଧମାଳ ଜିଲ୍ଲା କ.ନୁଆଗାଁ ପୋଲିସ୍ । ସୂଚନା ପ୍ରକାରେ ଆଜି ସକାଳେ ପ୍ରାୟ ୮ଟା ୪୦ ମିନିଟ୍ ସମୟରେ କ.ନୁଆଗାଁ ପୋଲିସ୍ ପକ୍ଷରୁ ଏସ୍ଆଇ ପି.କେ. ବେହେରାଙ୍କ ନେତୃତ୍ବରେ ଏକ ଟିମ୍ କଞ୍ଜମେଣ୍ଡି-ଦାରିଙ୍ଗବାଡ଼ି ଛକରେ ପେଟ୍ରୋଲିଂ କରୁଥିବା ସମୟରେ ଏକ ଡଷ୍ଟର କାର୍ ଦ୍ରୁତ ଗତିରେ ଯାଉଥିବା ବେଳେ ତାକୁ ଅଟକାଇବା ସହ ଯାଞ୍ଚ୍ କରିଥିଲେ । ସେଥିରେ ୪୪ କେଜି ୫୮୫ ଗ୍ରାମ୍ ଓଜନର ବେଆଇନ୍ ଗଞ୍ଜେଇ ଜବତ କରିବା ସହ ଚାଲାଣକାରୀ ଡ୍ରାଇଭରକୁ ଗିରଫ କରିବାରେ ସକ୍ଷମ ହୋଇଛି ପୋଲିସ୍ । ଘଟଣାରେ କ.ନୁଆଗାଁ ଥାନା କେସ୍ ନଂ-୭୩/୨୦୨୩ରେ ଏକ ମାମଲା ରୁଜୁ କରି ଚାଲାଣକାରୀକୁ କୋର୍ଟ ଚାଲାଣ କରିଛି ପୋଲିସ୍ । ଗିରଫ ଚାଲାଣକାରୀ ଜଣକ ଗଜପତି ଜିଲ୍ଲା ମୋହନା ଥାନା ଅନ୍ତର୍ଗତ ଅନ୍ତରବା ଅଞ୍ଚଳର ମାନସ ରଞ୍ଜନ ଗମାଙ୍ଗ ହୋଇଥିବା ପୋଲିସ୍ ପକ୍ଷରୁ ସୂଚନା ମିଳିଛି । ଜବତ ଗଞ୍ଜେଇର ଆନୁମାନିକ ମୂଲ୍ୟ ଦୁଇ ଲକ୍ଷ ଟଙ୍କାରୁ ଉର୍ଦ୍ଧ୍ବ ହେବ ବୋଲି ଆକଳନ କରାଯାଉଛି । ସେପଟେ ଘଟଣାର ଅଧିକ ତଦନ୍ତ ଜାରି ରଖିଥିବା କହିଛନ୍ତି ଥାନା ଅଧିକାରୀ କୁମର ମୁଦୁଲି ।