ଫୁଲବାଣୀ : ଭୁବନେଶ୍ୱର ସ୍ଥିତ କଳିଙ୍ଗ ଷ୍ଟାଡ଼ିୟମଠାରେ ଅନୁଷ୍ଠିତ ହୋଇଥିବା ଓଡ଼ିଶା ରାଜ୍ୟ ପାରା ଆଥେଲେଟିକ୍ ୨୦୨୩ରେ କ୍ରୀଡା ଓ ଯୁବ ସେବା ପ୍ରତିଯୋଗିତାରେ କନ୍ଧମାଳ ଜିଲ୍ଲାର ପାଞ୍ଚ ଜଣ ଭିନ୍ନକ୍ଷମ ଯୁବକଯୁବତୀ ବିଭିନ୍ନ କ୍ରୀଡା ପ୍ରତିଯୋଗିତାରେ ଭାଗ ନେଇଥିଲେ । ସେମାନଙ୍କ ମଧ୍ୟରୁ ଅନିଲ କୁମାର ପରିଡ଼ା ଜାଭେଲିନରେ ଗୋଲ୍ଡ, ଡିସକସ୍ ଥ୍ରୋରେ ସିଲଭର ଏବଂ ସଟ୍ଫୁଟ୍ରେ ଗୋଲ୍ଡ ପଦକ ହାସଲ କରିଛନ୍ତି । ସେହିପରି ଦାରିଙ୍ଗିବାଡ଼ିର ନିଖିଲେସ ପ୍ରଧାନ ୧୦୦ ମିଟର ଦୌଡ଼ରେ ଗୋଲ୍ଡ ଏବଂ ୪୦୦ ମିଟର ଦୌଡ଼ରେ ସିଲଭର ପଦକ ପାଇ କନ୍ଧମାଳ ଜିଲ୍ଲା ପାଇଁ ଗୌରବ ଆଣିଛନ୍ତି । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ନିର୍ଦ୍ଦେଶ କ୍ରମେ ରାଜ୍ୟରେ ଆୟୋଜିତ ହେଇଥିବା ୨୦୨୩ ଓଡ଼ିଶା ରାଜ୍ୟ ପାରା ଆଥେଲେଟିକ୍ କ୍ରୀଡା ପ୍ରତିଯୋଗିତାରେ ରାଜ୍ୟରୁ ଅନେକ ଭିନ୍ନକ୍ଷମ ଯୁବକ ଯୁବତୀ ଭାଗ ନେବାପାଇଁ ପ୍ରତ୍ୟେକ ଜିଲ୍ଲାର ଜିଲ୍ଲାପାଳ ଏବଂ ଜିଲ୍ଲା ଗୋଷ୍ଠୀ ସାମାଜିକ ସୁରକ୍ଷା ଅଧିକାରୀମାନଙ୍କୁ ଅବଗତ କରାଇଥିଲେ । ସେହି ନିର୍ଦ୍ଦେଶ ଅନୁସାରେ କନ୍ଧମାଳ ଜିଲ୍ଲାପାଳ ଆଶିଷ ଈଶ୍ୱର ପାଟିଲ ଏବଂ ଜିଲ୍ଲା ସାମାଜିକ ସୁରକ୍ଷା ଅଧିକାରୀ ବଳରାମ ସେଠୀ ଏବଂ ଫୁଲବାଣୀ ସଦର ମହୁକୁମା ଗୋଷ୍ଠୀ ସାମାଜିକ ସୁରକ୍ଷା ଅଧିକାରୀ ପ୍ରମୋଦ କୁମାର ବଡ଼ସେଠଙ୍କ ନେତୃତ୍ୱରେ କନ୍ଧମାଳ ଜିଲ୍ଲାରୁ ୫ଜଣ ଭିନ୍ନକ୍ଷମ ଯୁବକ ଯୁବତୀ ଏହି ରାଜ୍ୟ ସ୍ତରୀୟ କ୍ରୀଡା ପ୍ରତିଯୋଗିତାରେ ଅଂଶ ଗ୍ରହଣ କରିଥିଲେ । ସେଥି ମଧ୍ୟରୁ ଦୁଇ ଜଣ ଯୁବକ କନ୍ଧମାଳ ଜିଲ୍ଲା ପାଇଁ ଗୌରବ ଆଣିଥିବାରୁ ତାଙ୍କୁ ଜିଲ୍ଲା ତରଫରୁ ସ୍ୱାଗତ ଓ ଶୁଭେଚ୍ଛା ଜଣେଇ ଥିବାବେଳେ ରାଜ୍ୟ ସ୍ତରୀୟ କ୍ରୀଡା ପ୍ରତିଯୋଗିତାରେ ଚମ୍ପିୟାନ୍ ହେଇଥିବା ଦୁଇ ଭିନ୍ନକ୍ଷମ ଯୁବକ କନ୍ଧମାଳ ଜିଲ୍ଲାପାଳ, ଜିଲ୍ଲା ସାମାଜିକ ସୁରକ୍ଷା ଅଧିକାରୀ ଏବଂ ସଦର ଗୋଷ୍ଠୀ ସାମାଜିକ ସୁରକ୍ଷା ଅଧିକାରୀଙ୍କୁ କୃତଜ୍ଞତା ଜଣେଇଛନ୍ତି ।