ବ୍ରହ୍ମପୁର: ବଡ଼ ବଜାର ଥାନା ଅର୍ନ୍ତଗତ ଧାନମେରା ସାହିର ଏକ ଘରୁ ଗତ ମଙ୍ଗଳବାର ଦିନ ନବ ବଧୂ ଭୁବନେଶ୍ୱରୀ ମୁଖୀଙ୍କ ମୃତଦେହ ଉଦ୍ଧାର କରିଥିଲା ପୁଲିସ । ଏ ନେଇ ମୃତ ଭୁବନେଶ୍ୱରୀଙ୍କ ବାପା ଲିଙ୍ଗରାଜ ମୁଖୀ ଥାନାରେ ହତ୍ୟା ଅଭିଯୋଗ କରିଥିଲେ । ଅଭିଯୋଗକୁ ଆଧାର କରି ପୁଲିସ ଏକ ଯୌତୁକ ନିର୍ଯାତନା ସହ ହତ୍ୟା ମାମଲା ରୁଜୁ କରି ମୃତ ଭୁବନେଶ୍ୱରୀଙ୍କ ସ୍ୱାମୀ ନରସୀମା ନାୟକଙ୍କୁ ଗିରଫ କରିଛି । ଏହା ସହ ଅଭିଯୁକ୍ତ ସ୍ୱାମୀ ନରସୀମାଙ୍କ ଘରେ ଥିବା ମୃତ ଭୁବନେଶ୍ୱରୀଙ୍କ ଦୁଇ ତୋଳାରୁ ଅଧିକ ସୁନା ଗହଣା,ଟିଭି, ଆଲମାରୀ ସମେତ ଅନ୍ୟାନ୍ୟ ସାମଗ୍ରୀ ଜବତ କରିଛି । ଏହି ଜବତ ସାମଗ୍ରୀ ପୁଲିସ ମୃତ ଭୁବନେଶ୍ୱରୀଙ୍କ ବାପ ଘର ଲୋକକୁ ହସ୍ତାନ୍ତର କରିବ ବୋଲି ପୁଲିସ କହିଛି । ଶୁକ୍ରବାର ଅଭିଯୁକ୍ତ ନରସୀମାଙ୍କୁ କୋର୍ଟ ଚାଲାଣ କରାଯାଇଥିବା ବଡ଼ ବଜାର ଥାନା ଅଧିକାରୀ ପ୍ରଶାନ୍ତ ଭୂପତି ସୂଚନା ଦେଇଛନ୍ତି । ଏହା ସହ ଘଟଣାର ତଦନ୍ତ ଜାରି ରହିଥିବା ସେ କହିଛନ୍ତି । ମିଳିଥିବା ସୂଚନା ପ୍ରକାରେ, ଧାନମେରା ସାହିର ଲିଙ୍ଗରାଜ ମୁଖୀଙ୍କ ଝିଅ ଭୁବନେଶ୍ୱରୀ ମୁଖୀଙ୍କୁ ତାଙ୍କ ପଡୋଶୀ ଘରର ତ୍ରିଲୋଚନ ନାୟକଙ୍କ ପୁଅ ନରସୀମା ନାୟକ ଗତ ୩ମାସ ପୂର୍ବେ ପ୍ରେମ ବିବାହ କରିଥିଲେ । ବିବାହର କେଇଟା ଦିନ ପରେ ଝିଅ ଭୁବନେଶ୍ୱରୀଙ୍କୁ ତାଙ୍କ ସ୍ୱାମୀ,ଶାଶୂ ଶଶୁର ଓ ନଣଦ ମାନସିକ ନିର୍ଯ୍ୟାତନା ଦେଉଥିଲେ । ଏପରି କି ଯୌତୁକ ନିର୍ଯାତନା ଦେବା ସହ ମାଡ଼ ମାରୁଥିଲେ । ଗତ ମଙ୍ଗଳବାର ସକାଳେ ଝିଅଙ୍କୁ ତାଙ୍କ ଶଶୁର ଘର ଲୋକେ ମାଡ଼ମାରିଥଲେ । ପରେ ଝିଅକୁ ମାରି ଦେଇ ଲୁଗାରେ ଟଙ୍ଗେଇ ଦେଇଥିବା ବାପା ବଡ଼ ବଜାର ଥାନାରେ ଅଭିଯୋଗ କରିଥିଲେ । ଉକ୍ତ ଅଭିଯୋଗକୁ ଭିତ୍ତି କରି ଏକ ହତ୍ୟା ମାମଲା ରୁଜୁ କରି ମୃତ ମହିଳାଙ୍କ ସ୍ୱାମୀ ନରସୀମାଙ୍କୁ ଗିରଫ କରିଛି ।