ବାଲିଗୁଡ଼ା:ଗଞ୍ଜେଇ ଚୋରା ଚାଲାଣ ବେଳେ ପୋଲିସ୍ ପକ୍ଷରୁ ଚଢ଼ାଉ । ୨୨କେଜି ୩୫୦ଗ୍ରାମ୍ ଓଜନର ବେଆଇନ୍ ଗଞ୍ଜେଇ ସହ ବୋଲେରୋ ପିକ୍ ଅପ୍ ଭ୍ୟାନ୍ ଜବତ କରିଛି ପୋଲିସ୍ । ଘଟଣାରେ ଜଣେ ଚାଲାଣକାରୀ ଗିରଫ ହୋଇଥିବା ଜଣାପଡିଛି । କନ୍ଧମାଳ ଜିଲ୍ଲା ଦାରିଙ୍ଗବାଡି ଥାନା ପୋଲିସ୍ ପେଟ୍ରୋଲିଂ କରୁଥିବା ବେଳେ ଦ୍ରୁତ ଗତିରେ ଯାଉଥିବା ଏକ ବୋଲେରୋ ପିକ୍ ଅପ୍ ଭ୍ୟାନ (ଓଆର୍ ୦୫ଏଭି ୫୩୨୪)କୁ କାବୁ କରିବା ସହ ସେଥିରୁ ବେଆଇନ୍ ଗଞ୍ଜେଇ ଜବତ କରିବା ସହ ଚାଲାଣକାରୀକୁ ଗିରଫ କରି କୋର୍ଟ ଚାଲାଣ କରିଛି ଦାରିଙ୍ଗବାଡି ପୋଲିସ୍ । ଗିରଫ ଚାଲାଣକାରୀ ଜଣକ ବାଲିଗୁଡ଼ା ଥାନା ସଲାକିଆ ଗ୍ରାମର ଦିପକ ଦିଗାଳ ହୋଇଥିବା ବେଳେ ଜବତ ଗଞ୍ଜେଇ ବାଲିଗୁଡ଼ା ଅଞ୍ଚଳରୁ ବ୍ରହ୍ମପୁରକୁ ଚୋରା ଚାଲାଣ ହେଉଥିବା କହିଛନ୍ତି ଥାନା ଅଧିକାରୀ କୌଶିକ ମାଝୀ । ଜବତ ଗଞ୍ଜେଇର ଆନୁମାନିକ ମୂଲ୍ୟ ପ୍ରାୟ ଦେଢ଼ ଲକ୍ଷ ଟଙ୍କା ହେବ ବୋଲି ଆକଳନ କରାଯାଉଛି । ଅନ୍ୟପଟେ ଦାରିଙ୍ଗବାଡି ଥାନା କେସ୍ ନଂ-୬୫/୨୦୨୩ ରେ ଏକ ମାମଲା ରୁଜୁ କରି ତଦନ୍ତ ଜାରି ରଖିଛି ପୋଲିସ୍ ।