ହରଭଙ୍ଗା : ହାଇୱା ପଛରେ ପିଟିଲା ବାଇକ । ବାଇକ ଚାଳକ ମୃତ ଓ ଅନ୍ୟ ଦୁଇଜଣ ଗୁରୁତର । ଗୁରୁତରଙ୍କୁ ପ୍ରଥମେ ପୁରୁଣାକଟକ ଓ ପରେ ବୌଦ୍ଧ ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଛି । ସୂଚନା ଅନୁଯାୟୀ ବୌଦ୍ଧ ଜିଲ୍ଲା ପୁରୁଣାକଟକ ଥାନା ଲୁଣିବାହାଲ ଗ୍ରାମର ସୁଶାନ୍ତ ମଲିକ ଓ ବୌଦ୍ଧ ଥାନା ଖଜୁରୀପଡା ଗ୍ରାମର ସାନୁଜ ପ୍ରଧାନ ଓ ଅଚ୍ୟୁତ ପ୍ରଧାନ ଏକ ବାଇକ ଯୋଗେ ଶୋରିସପଖାଳ ଗ୍ରାମରୁ ଫେରୁଥିବା ବେଳେ ଚାରିଛକ-କୁଶଙ୍ଗ ପୂର୍ତ୍ତି ରାସ୍ତାର ବାଘଛେପ୍ରା ନିକଟରେ ସମ୍ମୁଖରେ ଯାଉଥିବା ଏକ ବାଲି ବୋଝେଇ ହାଇୱା ( ଓଡି୨୩ଇ୧୩୧୯)କୁ ପଛପଟୁ ଧକ୍କା ଦେଇଥିଲା । ଫଳରେ ଘଟଣା ସ୍ଥଳରେ ସୁଶାନ୍ତଙ୍କ ମୃତ୍ୟୁ ହୋଇଥିବା ବେଳେ ଅନ୍ୟ ଦୁଇଜଣ ଗୁରୁତର ହୋଇଥିଲେ । ସ୍ଥାନୀୟ ଲୋକେ ଆମ୍ବୁଲାନ୍ସ ଯୋଗେ ଦୁଇଜଣଙ୍କୁ ପୁରୁଣାକଟକ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ ଭର୍ତ୍ତି କରିଥିଲେ । ଉଭୟଙ୍କ ଅବସ୍ଥା ସଙ୍କଟାପନ୍ନ ହେବାରୁ ତାଙ୍କୁ ବୌଦ୍ଧ ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତରିତ କରାଯାଇଛି । ଏନେଇ ପୁରୁଣାକଟକ ପୋଲିସ ଶବ ଜବତ କରି ତଦନ୍ତ ଚଳାଇଛି ।