ଫୁଲବାଣୀ: ଅକ୍ଷୟ ତୃତୀୟା ଦିନ ଶାସକ ବିଜୁ ଜନତା ଦଳ ପକ୍ଷରୁ ଭୁବନେଶ୍ୱରରେ ନୂତନ ଭାବେ ନିର୍ମିତ ହୋଇଥିବା ଶଙ୍ଖ ଭବନକୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଲୋକାର୍ପିତ କରିଛନ୍ତି । ଏହି ଶଙ୍ଖ ଭବନର ୨୦୨୧ ରଥ ଯାତ୍ରା ସମୟରେ ଏହି କୋଠାର ମୂଳଦୁଆ ପକାଯାଇଥିଲା । ବିଜେଡିର ଏହି ନୂତନ ପାର୍ଟୀ ମୁଖ୍ୟାଳୟ କୋଠାରେ ଓଡ଼ିଶାର କଳା, ସଂସ୍କୃତି ଏବଂ ଐତିହ୍ୟକୁ ଚିତ୍ରିତ ପଥର ଖୋଦାରେ ସଜାଯାଇଛି । ଏହି ତିନି ମହଲା ବିଶିଷ୍ଟ କୋଠାରେ ଏକ ବଡ଼ ବେସମେଣ୍ଟ ପାର୍କିଂ, ୨୦୦୦ ଲୋକଙ୍କୁ ଧାରଣ କରିବାର କ୍ଷମତା ବିଶିଷ୍ଟ ଏକ ବୃହତ ଶୀତତାପ ନିୟନ୍ତ୍ରିତ ସମ୍ମିଳନୀ ହଲ୍, ୨୫୦ ପାଇଁ ଏକ ଅଡିଟୋରିୟମ୍ ଏବଂ ଏକ କ୍ୟାଣ୍ଟିନ ଅଛି । ନିୟମିତ ପ୍ରେସ୍ ମିଟ୍ ପାଇଁ ଏହାର ଏକ ସ୍ୱତନ୍ତ୍ର ହଲ୍ ମଧ୍ୟ ଅଛି । ଏସବୁ ବିଲ୍ଡିଂର ପ୍ରଥମ ମହଲାରେ ଅବସ୍ଥିତ ।ଏହି ଭବନର ଉଦ୍ଘାଟନୀ ଅବସରରେ କନ୍ଧମାଳ ଜିଲ୍ଲା ବିଜୁ ଜନତା ଦଳ ପର୍ଯ୍ୟବେକ୍ଷକ ବିଜୟ ନାୟକ, ସାଂସଦ ଡ଼ଃ.ଅଚ୍ୟୁତ ସାମନ୍ତ, କନ୍ଧମାଳ ଜିଲ୍ଲାର ତିନି ବିଜେଡି ବିଧାୟକ ଅଙ୍ଗଦ କହଁର, ଚକ୍ରମଣି କହଁର ଏବଂ ସାଲୁଗା ପ୍ରଧାନ, ଜିଲ୍ଲା ସଭାପତି ସରୋଜ କର୍ଣ୍ଣ, ରୋଦନ ମଲ୍ଲିକ, ଜିଲ୍ଲା ପରିଷଦ ଅଧ୍ୟକ୍ଷା ସୁଶ୍ରୀ ନନ୍ଦିନୀ ମଲ୍ଲିକ, ବାଲିଗୁଡା ବିଜେଡି ସଭାପତି ଟୁନା ଦାଶ, ଛାତ୍ର ସଭାପତି ସୁନିଲ ସେଠୀଙ୍କ ସମେତ ବରିଷ୍ଠ କର୍ମକର୍ତ୍ତା ଓ ଲୋକ ପ୍ରତିନିଧିମାନେ ଯୋଗଦେଇଥିଲେ । ଏହି ପରିପ୍ରେକ୍ଷୀରେ ମୁଖ୍ୟମନ୍ତ୍ରୀଙ୍କ ବିକାଶମୂଳକ କାର୍ଯ୍ୟର ପ୍ରଶଂସା କରିବା ସହ ଏହାକୁ ଗାଁ ଗାଁରେ ପହଞ୍ଚାଇବାକୁ କନ୍ଧମାଳ ଜିଲ୍ଲା ବିଜେଡି ପର୍ଯ୍ୟବେକ୍ଷକ ବିଜୟ ନାୟକ ପରାମର୍ଶ ଦେଇଥିଲେ ।