ହରଭଙ୍ଗା : ବୌଦ୍ଧ ଜିଲ୍ଲା ହରଭଙ୍ଗା ବ୍ଲକ ପୁରୁଣାକଟକ ହାଇସ୍କୁଲ ପଡିଆଠାରେ ଚାଲିଥିବା ବ୍ଲକ ସ୍ତରୀୟ ମା’ ଭୈରବୀ କ୍ରିକେଟ ଟୁର୍ଣ୍ଣାମେଣ୍ଟ ଗୁରୁବାର ଦିନ ଉଦଯାପିତ ହୋଇଯାଇଛି । ଫାଇନାଲ ମ୍ୟାଚରେ ଯୁବରାଜପୁର ଓ ପୁରୁଣାକଟକ ମୁହାଁମୁହିଁ ହୋଇଥିଲେ ।ପ୍ରଥମେ ବ୍ୟାଟିଂ କରି ପୁରୁଣାକଟକ ନିର୍ଦ୍ଧାରିତ ୧୫ ଓଭରରେ ୭ ୱିକେଟ ହରାଇ ୧୪୩ ରନ କରିଥିବା ବେଳେ ପ୍ରତିବଦଳରେ ଯୁବରାଜପୁର ୧୪.୪ଓଭରରେ ସମସ୍ତ ୱିକେଟ ହରାଇ ୧୨୧ ରନ କରିଥିଲେ । ଫଳରେ ପୁରୁଣାକଟକ ଚାମ୍ପିୟନ ହୋଇଥିଲା । ଉଦଯାପନୀ ଦିବସରେ ମୁଖ୍ୟ ଅତିଥି ଭାବେ ହରଭଙ୍ଗା ବ୍ଳକ ଉପାଧ୍ୟକ୍ଷ ସରୋଜ ପ୍ରଧାନ, ସମ୍ମାନିତ ଅତିଥିଭାବେ ଜିଲ୍ଲା କ୍ରିକେଟ ଆସୋସିଏସନର ସଂପାଦକ ଯୁଗଳ କିଶୋର ସାମଲ, ଶିଳ୍ପପତି ଅଶୋକ ଅଗ୍ରୱାଲ, ଭୈରବୀ କ୍ଳବର ସଭାପତି ଅକୁର ସେଠୀ ପ୍ରମୁଖ ମଞ୍ଚସୀନ ରହି ବିଜେତା ଓ ଉପବିଜେତା ଦଳକୁ ଟ୍ରଫି ଓ ପୁରସ୍କାର ରାଶି ପ୍ରଦାନ କରିଥିଲେ । ଏହି ଅବସରରେ ଜିଲ୍ଲା କ୍ରିକେଟ ଆସୋସିଏସନର ସମ୍ପାଦକ ଖେଳାଳି ମାନଙ୍କୁ ଆଗାମୀ ଦିନରେ ଭଲ ଖେଳ ପ୍ରଦର୍ଶନ କରିବା ଓ ହରଭଙ୍ଗା ବ୍ଲକରେ ଏକ ନୂତନ କ୍ରିକେଟ୍ ଟିମ ଗଠନ କରି ଜିଲ୍ଲା ତଥା ରାଜ୍ୟ ସ୍ତରରେ ଉଚ୍ଚକୋଟିର ଖେଳ ପ୍ରଦର୍ଶନ ପାଇଁ ପରାମର୍ଶ ଦେଇଥିଲେ । ଟୁର୍ଣ୍ଣାମେଣ୍ଟକୁ କମିଟିର ସମସ୍ତ ସଦସ୍ୟ ସହଯୋଗ କରିଥିଲେ ।