ଦଶପଲ୍ଲା : ନୟାଗଡ଼ ଜିଲ୍ଲା ଓଡ଼ଗାଁ ବ୍ଲକର କୁରାଳ ଓ ଶରଧାପୁର ପଞ୍ଚାୟତରେ ପୂର୍ବତନ ମନ୍ତ୍ରୀ ତଥା ବର୍ତ୍ତମାନର ବିଧାୟକ ଡ଼ ଅରୁଣ କୁମାର ସାହୁଙ୍କ ମାରାଥନ ଉଦଘାଟନ ଓ ଶିଳାନ୍ୟାସ କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଛି । ଓଡ଼ଗାଁ ତହସିଲ ୯ ଗୋଟି ଆରଆଇ ସର୍କଲ ରହିଥିବାବେଳେ ଜନସାଧାରଣଙ୍କ ହାତ ପାଆନ୍ତାରେ ତତ୍କାଳ ସେବା ଯୋଗାଇଦେବା ପାଇଁ ନୟାଗଡ଼ ବିଧାୟକଙ୍କ ଉଦ୍ୟମରେ ପନ୍ତିଖାରୀ, ଶରଧାପୁର, କଜଳାଇପଲ୍ଲୀ ଓ କୁରାଳ ଠାରେ ନୂତନ ଆରଆଇ ସର୍କଲ ନିମନ୍ତେ ସ୍ୱୀକୃତି ମିଳିଥିଲା । ଆଜି ନୟାଗଡ଼ ବିଧାୟକ ଓଡ଼ଗାଁ ଗସ୍ତରେ ଆସି ଶରଧାପୁର ଓ କୁରାଳ ଗସ୍ତ କରି ୩୮ ଲକ୍ଷ ବ୍ୟୟ ଅଟକଳରେ ନୂତନ ରାଜସ୍ୱ ନିରୀକ୍ଷକଙ୍କ କାର୍ଯ୍ୟାଳୟ ନିର୍ମାଣ ନିମନ୍ତେ ଭିଭିପ୍ରସ୍ତର ସ୍ଥାପନ କରିଥିଲେ । କୁରାଳଠାରେ ୭ ଲକ୍ଷ ବ୍ୟୟ ଅଟକଳରେ ନୂତନ ମିଶନ ଶକ୍ତି ଗୃହ,୮ ଲକ୍ଷରେ ନିର୍ମିତ ବର୍ଜ୍ୟବସ୍ତୁ ପରିଚାଳନା ଗୃହ, ୪ ଲକ୍ଷ ୫୦ ହଜାରରେ ନିର୍ମିତ ପ୍ରାଣୀ ଚିକିତ୍ସାଳୟ ଗୃହ ଆଦିର ଉଦଘାଟନ କରିଥିଲେ । ଶରଧାପୁର ଠାରେ ୭ ଲକ୍ଷ ବ୍ୟୟ ଅଟକଳରେ ନିର୍ମିତ ସ୍ୱାସ୍ଥ୍ୟ ଓ ଆରୋଗ୍ୟ ଉପକେନ୍ଦ୍ର,୩ ଲକ୍ଷରେ ନିର୍ମିତ ପଞ୍ଚାୟତର ନୂତନ ସଭାଗୃହ ଆଦିର ଉଦଘାଟନ କରିଥିଲେ । ଉଦଘାଟନୀ ଉତ୍ସବରେ ବ୍ଲକ ଅଧ୍ୟକ୍ଷ ଲୋକନାଥ ସାହୁ, ବିଡ଼ିଓ ସନ୍ତୋଷ କୁମାର ଜେନା,ତହସିଲଦାର ଅନିଲ କୁମାର ଆଚାର୍ଯ୍ୟ, ଜିଲ୍ଲା ପରିଷଦ ସଭ୍ୟା ବିରଜାଲକ୍ଷ୍ମୀ ସାହୁ, ଝିଲି ପ୍ରଧାନ,ସରପଞ୍ଚ ବିଜନ ପାଇକରାୟ,ଚାନ୍ଦିନୀ ରାଉତ ପ୍ରମୁଖ ଉପସ୍ଥିତ ଥିଲେ । ପରିଶେଷରେ ଭଗବତୀପ୍ରସାଦ ଯଜ୍ଞ ଓ ପାଇକସାହି ଯଜ୍ଞରେ ଯୋଗ ଦେଇଥିଲେ ।