ପୁରୀ : ହୋଟେଲରୁ ପର୍ଯ୍ୟଟକ ନିଖୋଜ । ପୁରୀ ସମୁଦ୍ର କୂଳ ଥାନା ଚକ୍ରତୀର୍ଥ ରୋଡରେ ଥିବା ହୋଟେଲ ଶାନ୍ତି ପ୍ୟାଲେସରୁ ଜଣେ ୧୮ ବର୍ଷୀୟା ଯୁବତୀ ନିଖୋଜ ହୋଇଥିବା ନେଇ ଥାନାରେ ଅଭିଯୋଗ ହୋଇଛି । ବୁଧବାର ସକାଳେ ଯୁବତୀ ଜଣକ ହୋଟେଲ ବାହାରକୁ ଆସିଥିବା ବେଳେ ଆଉ ରୁମକୁ ଫେରିନଥିବା ଅଭିଯୋଗ ହୋଇଛି । ନିଖୋଜ ଯୁବତୀ ଜଣକ ହେଲେ ମଧ୍ୟପ୍ରଦେଶ ସାଗର ଗ୍ରାମର ପ୍ରହଲ୍ଲାଦ କୁଶୁୱାଙ୍କ ଝିଅ ରାଧିକା କୁଶୁୱା । ନିଖୋଜ ଯୁବତୀଙ୍କ ବାପାଙ୍କ ସୂଚନା ଅନୁସାରେ ବୁଧବାର ଦିନ ୫ଟା ୪୨ ସମୟରେ କାହାକୁ କିଛି ନକହି ରାଧିକା ହୋଟେଲ୍ ରୁମରୁ ଏକୁଟିଆ ବାହାରକୁ ଆସିଥିଲା । ତେବେ ଦୀର୍ଘ ସମୟ ଧରି ହୋଟେଲକୁ ରାଧିକା ନଫେରିବା ପରେ ପରିବାର ଲୋକେ ଚିନ୍ତାରେ ପଡ଼ି ଯାଇଥିଲେ । ଏନେଇ ସମୁଦ୍ର କୂଳ ଥାନାରେ ଅଭିଯୋଗ ହେବା ପରେ ପୋଲିସ ତଦନ୍ତ ଆରମ୍ଭ କରିଛି । ହୋଟେଲରେ ଥିବା ସିସିଟିଭି ଫୁଟେଜକୁ ପୋଲିସ ଚେକ୍ କରିବା ସହ ସ୍ଥାନୀୟ ଅଞ୍ଚଳରେ ଅନୁସନ୍ଧାନ ଜାରୀ ରଖିଛି । ଘଟଣାକୁ ୨୪ ଘଣ୍ଟାରୁ ଉର୍ଦ୍ଧ୍ୱ ସମୟ ବିତିଯାଇଥିଲେ ମଧ୍ୟ ଯୁବତୀଙ୍କର କୌଣସି ପତ୍ତା ପାଇନି ପୋଲିସ । ଗତ ୨୧ ତାରିଖରେ ପ୍ରହଲ୍ଲାଦ ତାଙ୍କ ସମ୍ପର୍କୀୟ ଓ ପଡୋଶୀଙ୍କ ସହ ପୁରୀ ବୁଲିବାକୁ ଆସିଥିଲେ । ତେବେ ତାଙ୍କ ପଡୋଶୀ ବୁଧବାର ହୋଟେଲରୁ ଯିବା ପରେ ତାଙ୍କ ଝିଅ ନିଖୋଜ ହୋଇଥିବା ସେ କହିଛନ୍ତି । ଏପଟେ ପୋଲିସ ପକ୍ଷରୁ କୈାଣସି ପ୍ରତିକ୍ରିୟା ମିଳିପାରିନାହିଁ ।