ସୁବର୍ଣ୍ଣପୁର : ସୁବର୍ଣ୍ଣପୁର ଜିଲ୍ଲାର ଏକ ମାତ୍ର ଶିଳ୍ପାନୁଷ୍ଠାନ ଭାବେ ସୋନପୁର ସୂତାକଳ ଦୀର୍ଘଦିନ ହେଲା ଘରୋଇକରଣ ହୋଇ ହସ୍ତାନ୍ତର ହୋଇଥିଲା ବାଲାଜୀ ଗଣପତି ସୂତାକଳକୁ ହେଲେ ସେ ସମୟରେ ଥିବା ସମସ୍ତ ସର୍ତ୍ତକୁ ଜଳାଞ୍ଜଳି ଦେଇ କର୍ତ୍ତୃପକ୍ଷଙ୍କ ମନମାନି ଯୋଗୁଁ ଦୀର୍ଘ ଦିନପରେ ମଧ୍ୟ ସମାନ କାମକୁ ସମାନ ଦରମା ପ୍ରଦାନ ନକରି ଏପରିକି ସରକାରଙ୍କ ଘୋଷିତ ସର୍ବନିମ୍ନ ମଜୁରୀ ମଧ୍ୟ ପ୍ରଦାନ ନକରିବା କାରଣରୁ ସୂତାକଳରେ ଶ୍ରମିକ ଅଶାନ୍ତି ଦେଖାଦେଇଛି । ସୂତାକଳକୁ ପୂର୍ଣ୍ଣକ୍ଷମ କରାନଯାଇ ହାତଗଣତି କେତେକ ଶ୍ରମିକକୁ ନେଇ ଚାଳିଛି ଏହି ସୂତାକଳ । ପୂର୍ବରୁ ପ୍ରାୟ ୧୨୦୦ ଶ୍ରମିକ ଓ ୩୦୦ରୁ ଅଧିକ କର୍ମଚାରୀ ଏହି ସୂତାକଳରେ କାମ କରୁଥିବାବେଳେ ଏବେ ଏହି ସୂତାକଳରେ ମାତ୍ର ୨୫୦ ଜଣ ଶ୍ରମିକ ଓ କିଛି କର୍ମଚାରୀଙ୍କୁ ନେଇ ନାମକୁମାତ୍ର ଚାଲୁଥିବା ବେଳେ ଅନେକ ସମୟରେ ବିଭିନ୍ନ କାରଣ ନେଇ କଳବନ୍ଦ ରହୁଛି । ଏବେ ଏହି ସୁତାକଳକୁ ପୂଣ୍ଣ ର୍କାର୍ଯ୍ୟକ୍ଷମ କରିବାକୁ ଦାବୀ ହେଉଥିବା ବେଳେ ଆଜି ବାଲାଜୀ ଗଣପତି ସୂତାକଳ ଶ୍ରମିକ ସଂଘ ପକ୍ଷରୁ ଶ୍ରମିକ ନେତା ତଥା ସଂଘର ଆଇନ ପରାମର୍ଶଦାତା ବଳଦେବ ପ୍ରସାଦ ବେଦବାକଙ୍କ ନେତୃତ୍ୱରେ ଏକ ଶୋଭାଯାତ୍ରା ବାହାରି ତାଙ୍କର ବିଭିନ୍ନ ଦାବି ଜିଲ୍ଲାପାଳଙ୍କୁ ଜଣାଇଛନ୍ତି ଶ୍ରମିକମାନେ । ସୂତାକଳର ଶ୍ରମିକମାନେ ସୂତାକଳ ସମ୍ମୁଖରୁ ଏକ ଶୋଭାଯାତ୍ରାରେ ବାହାରି ସହର ପରିକ୍ରମା କରିବା ପରେ ଜିଲ୍ଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ପହଞ୍ଚିଥିଲେ । ସେଠାରେ ବିକ୍ଷୋଭ ପ୍ରଦର୍ଶନ କରିବାସହିତ ଜିଲ୍ଲାପାଳଙ୍କୁ ଏକ ଦାବୀପତ୍ର ପ୍ରଦାନ କରିଛନ୍ତି । ସୂତାକଳକୁ ପୂର୍ଣ୍ଣକାର୍ଯ୍ୟକ୍ଷମ,ନିର୍ଦ୍ଧାରିତ ସର୍ବନିମ୍ନ ସରକାରୀ ମଜୁରୀ ପ୍ରଦାନ, ବକେୟା ଇ.ପି.ଏଫ ପ୍ରଦାନ ଆଦି ପ୍ରମୁଖ ଦାବୀ କରିଛନ୍ତି ସୂତାକଳର ଶ୍ରମିକମାନେ । ପରିଚାଳନା ଗତ ତ୍ରୁଟି ଯୋଗୁଁ ଶ୍ରମିକମାନେ ବର୍ଷସାରା କାମ ପାଉ ନ ଥିବାବେଳେ ଅନେକ ସମୟରେ ଶ୍ରମିକମାନେ ଶୋଷଣର ଶିକାର ହେଉଥିବା ଦେଖିବାକୁ ମିଳୁଛି । ଏପରିକି ପୂର୍ବରୁ ୫୬ ଖଣ୍ଡ ରିଂ ଫ୍ରେମ୍ ମେସିନ କାର୍ଯ୍ୟକ୍ଷମ ଥିବା ବେଳେ ଏବେ ମାତ୍ର ୧୫ ଖଣ୍ଡ ମେସିନ ଚାଲିଛି ସେହିପରି ୩୦ଖଣ୍ଡ କାର୍ଡିଂ ମେସିନ୍ ୧୫ଖଣ୍ଡ ସିଂପ୍ଲେକ୍ସ ମେସିନ୍ ଯାଗାରେ ଖୁବ୍ ଅଳ୍ପ ସଂଖ୍ୟକ ମେସିନ ନେଇ କେବଳ ନାମକୁମାତ୍ର ସୂତାକଳ ଚାଲିଛି ତେଣୁ ସୂତାକଳକୁ ସମ୍ପୂର୍ଣ୍ଣ କାର୍ଯ୍ୟକ୍ଷମ କରିବାରେ ପରିଚାଳନା ବୋର୍ଡ ବିଫଳ ହୋଇଥିବା ଅଭିଯୋଗ ହେଉଛି । ସୂତାକଳକୁ ସଂପୂର୍ଣ୍ଣ କାର୍ଯ୍ୟକ୍ଷମ କରି ଅଧିକ ସଂଖ୍ୟକ ଶ୍ରମିକ ଓ କର୍ମଚାରୀଙ୍କୁ ନିଯୁକ୍ତି ଦେବା ପାଇଁ ଶ୍ରମିକ ସଂଘ ପକ୍ଷରୁ ଦାବି ହୋଇଛି । ପୂର୍ବରୁ ଶ୍ରମିକଙ୍କୁ ସର୍ବନିମ୍ନ ମଜୁରୀ ପ୍ରଦାନ ନେଇ ସୁବର୍ଣ୍ଣପୁର ଜିଲ୍ଲାପାଳଙ୍କୁ ଏକ ସଭାରେ କଂପାନୀ କର୍ତ୍ତୃପକ୍ଷ ରାଜିହୋଇଥିବା ପରେବି ଖିଲାପ କରିବା କାରଣକୁ ଶ୍ରମିକମାନେ ସହଜରେ ଗ୍ରହଣ କରି ପାରିନାହାନ୍ତି । ଆଜିର ଏହି ବିକ୍ଷୋଭ ସମାବେଶରେ ଶ୍ରମିକ ସଂଘ ସଭାପତି ଯୋଗେନ୍ଦ୍ର ପଣ୍ଡା, ସାଧାରଣ ସଂପାଦକ ଧବଳେଶ୍ୱର କୁମ୍ଭାର, ଯୁବନେତା ସୁରେଶ ପାତ୍ର, ବ୍ୟାସଦେବ ମିଶ୍ର, ଶ୍ରଦ୍ଧାଞ୍ଜଳି ମିଶ୍ରଙ୍କ ସହ ଅନେକ ଶ୍ରମିକ ଶ୍ରମିକା ପ୍ରମୁଖ ଉପସ୍ଥିତ ଥିଲେ ।