ଘୁ ଉଦୟଗିରି : ସ୍ଥାନୀୟ ବ୍ଲକ ଅନ୍ତର୍ଗତ ମାଲିକାପୋଡି ପଞ୍ଚାୟତର ବତିଙ୍ଗିଆ କାମିନାଜୁ ନିକଟରେ ଓଆର ୦୨ଏଏମ୍ ୦୦୧୧ ନମ୍ବର ବିଶିଷ୍ଟ କାର ଭାରସାମ୍ୟ ହରାଇ ଆମ୍ବ ଗଛରେ ପିଟି ହେବା ଫଳରେ ଘୁ ଉଦୟଗିରି ପଠାଣ ସାହିର ଏମଡି ପୁର୍ ଖାନ (୩୦) ନାମକ ଯୁବକର ମୃତ୍ୟୁ ହୋଇଥିବା ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ର ପକ୍ଷରୁ ସୁଚନା ରହିଛି । ସୂଚନା ଅନୁସାରେ ୪ଜଣ ବ୍ୟକ୍ତି ପ୍ରଭୁ ଦତ୍ତ ପାଲ (୫୦), ଲତିଫା ନାୟକ (୨୨), ମହେଶ ନାୟକ (୨୭) ଓ ଏମଡି ପୁର ଖାନ (୩୦) ମିଶି ଉକ୍ତ କାର ଯୋଗେ କୌଣସି କାମରେ ମାଲିକାପୋଡି ପଞ୍ଚାୟତ ଅଧିନରେ ଥିବା ବତିଙ୍ଗିଆ କାମିନାଜୁ ଅଞ୍ଚଳକୁ ଯାଇଥିଲେ । କାମସାରି ଫେରୁଥିବା ସମୟରେ କୌଣସି କାରଣରୁ କାରଟି ରାସ୍ତା କଡ଼ରେ ଥିବା ଆମ୍ବ ଗଛରେ ଭାରସାମ୍ୟ ହରେଇ ପିଟି ହେବା ଫଳରେ କାରର ସମ୍ମୁଖ ଭାଗ ଚୁରମାର ହୋଇ ଚାଳକ ଏମଡି ପୁର୍ ଖାନଙ୍କ ମୃତ୍ୟୁ ହୋଇଥିବା ସୂଚନା ରହିଥିବା ବେଳେ ଅନ୍ୟ ତିନି ଜଣ ସାମାନ୍ୟ ଆହତ ହୋଇ ସ୍ଥାନୀୟ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ ଚିକିତ୍ସିତ ହେଉଛନ୍ତି । ଦୁର୍ଘଟଣା ଏତେ ଭୟଙ୍କର ଥିଲା ଯେ କାର ଭିତରେ ଥିବା ସୁରକ୍ଷା ବେଲୁନ ମଧ୍ୟ ଫାଟି ଯାଇ ପ୍ରଚଣ୍ଡ ଶବ୍ଦ କରିଥିଲା ବୋଲି ଅଞ୍ଚଳର ଲୋକେ ପ୍ରକାଶ କରିଛନ୍ତି । ଖବର ପାଇ ସ୍ଥାନୀୟ ଅଗ୍ନିଶମ ବାହିନୀ ଘଟଣା ସ୍ଥଳକୁ ପହଞ୍ଚି ଆହତ ବ୍ୟକ୍ତିମାନଙ୍କୁ ନେଇ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ର ଆଣିଥିଲେ । ପରେ ଦୁର୍ଘଟଣାର ସୂଚନା ପାଇ ସ୍ଥାନୀୟ ପୋଲିସ ପହଞ୍ଚି ରାସ୍ତା ମଝିରେ ଥିବା ଗାଡ଼ିକୁ ଘୁଞ୍ଚାଇ ରାସ୍ତାରୁ ଅବରୋଧ ହଟେଇଥିବା ଦେଖିବାକୁ ମିଳିଛି । ମୃତ୍ୟୁ ଖବର ପାଇବା ପରେ ଘୁ ଉଦୟଗିରିର ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ ଶୋକାକୁଳ ପରିବେଶ ଦେଖିବାକୁ ମିଳିଛି ।