ପୁରୀ : କୋଣାର୍କ ଥାନା ଅନ୍ତର୍ଗତ କୁରୁଜଙ୍ଗ ପଞ୍ଚାୟତ ତାଳସୁଆଁ ଗାଁ ବାରିକ ସାହିରେ ଗତକାଲି ବିଳମ୍ବିତ ରାତିରେ ସର୍ଟ ସର୍କିଟ ଯୋଗୁଁ ନିଆଁ ଲାଗି ୮ ବଖରା ଘର ଜଳିପୋଡି ଆତ୍ମସାତ ହୋଇଯାଇଛି । ମିଳିଥିବା ସୂଚନା ମୁତାବକ ତାଳସୁଆଁ ଗାଁ ବାରିକ ସାହିର ବାବୁଲି ବାରିକ, ପ୍ରଶାନ୍ତ ବାରିକ ଓ ମନୋଜ ବାରିକ ତିନି ଭାଇଙ୍କ ଘରେ ବିଳମ୍ବିତ ରାତିରେ ନିଆଁ ଲାଗି ଲକ୍ଷାଧିକ ଟଙ୍କାର ବହୁମୂଲ୍ୟ ସମ୍ପତ୍ତି, ଅସବାପତ୍ର, ନଗଦ ଟଙ୍କା, ସୁନା ଗହଣା ସହ ଅନେକ ଗୁଡିଏ ଜିନିଷ ପୋଡି ପାଉଁଶ ହୋଇଯାଇଛି । ତେବେ ଘରର କୌଣସି ଲୋକଙ୍କ କିଛି କ୍ଷତି ହୋଇନଥିଲେ ମଧ୍ୟ ଗ୍ରାମବାସୀଙ୍କ ସହଯୋଗରେ ନିକଟସ୍ଥ ଚମ୍ପାହର ଅଗ୍ନିଶମ ବିଭାଗକୁ ଡକାଇ ଥିଲେ ମଧ୍ୟ ଗାଁକୁ ରାସ୍ତା ନଥିବା ଯୋଗୁଁ ଅଗ୍ନିଶମ ବିଭାଗ ଗାଡି ପ୍ରାୟ ୧ ଘଣ୍ଟା ୩୦ ମିନିଟ ଧରି ଗାଁ ଦାଣ୍ଡ ରେ ଅଟକି ରହିଥିଲା ଫଳରେ ଗାଡି ପହଂଚିବା ବେଳକୁ ଘର ଜଳି ପାଉଁଶ ହୋଇଯାଇଥିଲା ବୋଲି କୁହନ୍ତି ପରିବାର ଓ ଗ୍ରାମବାସୀ । ତେବେ ବିପନ୍ନ ମାନଙ୍କୁ ସରକାରୀ ସାହାୟତା ପ୍ରଦାନ ପାଇଁ ଦାବି ହୋଇଛି ।