ପୁରୀ : ଶରଣ ଶ୍ରୀକ୍ଷେତ୍ର ଢେଙ୍କାନାଳ ଠାରେ ନୂତନ ଭାବେ ଶ୍ରୀଜଗନ୍ନାଥ ମନ୍ଦିର ନିର୍ମାଣ କରାଯିବ । ତେବେ ଏହା ପୂର୍ବରୁ ଶ୍ରୀଜଗନ୍ନାଥ, ଶ୍ରୀବଳଭଦ୍ର ଏବଂ ଦେବୀ ସୁଭଦ୍ରାଙ୍କ ଦାରୁ ଚିହ୍ନଟ କରାଯାଇ ପାରମ୍ପରିକ ପଦ୍ଧତି ତଥା ବନଯାଗ ଯାତ୍ରା ଯଜ୍ଞ କରାଯିବା ପାଇଁ ନୀତି ନିର୍ଘଣ୍ଟ କରାଯାଇଛି । କିନ୍ତୁ ଏହା ଜଗନ୍ନାଥ ସଂସ୍କୃତି ବିରୋଧି ବୋଲି ପୁରୀ ଶ୍ରୀମନ୍ଦିରର ଦଇତାପତି ସେବାୟତ ମାନେ ଅଭିଯୋଗ କରିଛନ୍ତି । ଶାସ୍ତ୍ରୀୟ ବିଧି ବିଧାନକୁ ନ ମାନି ଢେଙ୍କାନାଳ ଏକଘରିଆ ଠାରେ ଦାରୁ ବୃକ୍ଷ ସଂଗ୍ରହ କରିବା ଘଟଣାକୁ ନେଇ ପୁରୀ ସିଂହଦ୍ୱାର ଥାନାରେ ଦଇତାପତି ସେବାୟତ ମାନେ ଏତଲା ଦେଇଛନ୍ତି । ଦଇତାପତି ସେବକ ଜଗଦୀଶ ଦାସ ମହାପାତ୍ର ଥାନାରେ ଏହି ଏତଲା ଦେଇଥିବା ବେଳେ ହିନ୍ଦୁ ଧାର୍ମିକ ଭାବନାକୁ ଏହା କୁଠାର ଘାତ କରୁଛି ବୋଲି ସେ କହିଛନ୍ତି । ତେଣୁ ଏହି କାର୍ଯ୍ୟକ୍ରମକୁ ତୁରନ୍ତ ବନ୍ଦ କରିବା ସହ ଯେଉଁ ମାନେ ଏଭଳି କାର୍ଯ୍ୟ କରୁଛନ୍ତି ସେମାନଙ୍କ ବିରୋଧରେ ଦୃଢ କାର୍ଯ୍ୟାନୁଷ୍ଠାନ ଗ୍ରହଣ ପାଇଁ ଦଇତାପତି ସେବାୟତ ଦାବି କରିଛନ୍ତି ।