ଦଶପଲ୍ଲା : ନୟାଗଡ଼ ଜିଲ୍ଲା ଦଶପଲ୍ଲା ବ୍ଲକ୍ ଟାକରା ଗ୍ରାମପାୟତ ଅନ୍ତର୍ଗତ ପାହାଡି ଗ୍ରାମ ପାନାବାରୀର କୋକିଳ ପ୍ରଧାନ ( ୬୫ ) ଆଜି ପୂର୍ବାହ୍ନ ୧୧ ଘଟିକା ସମୟେ ନିଜ ଗ୍ରାମ ନିକଟସ୍ଥ ନାଳକୁ ଗାଧୋଇ ଯିବା ସମୟରେ ଏକ ଜଙ୍ଗଲୀ ଦନ୍ତା ବାର୍ହା ( ପୁରୁଷ ବାର୍ହା ) ମହିଳାଙ୍କୁ ଆକ୍ରମଣ କରି ଗୁରୁତର ଆହତ କରିଛି । ମହିଳାଙ୍କ ଦେହର ବିଭିନ୍ନ ସ୍ଥାନରେ ଗଭୀର କ୍ଷତ ହେବା ସହିତ ମହିଳା ସେହି ସ୍ଥାନରେ ହିଁ ଚେତାଶୂନ୍ୟ ହୋଇ ପଡିଥିଲେ । କିଛି ସମୟ ପରେ ଗ୍ରାମବାସୀମାନେ ମହିଳାଙ୍କୁ ଜଂଗଲ ଭିତରୁ ଉଦ୍ଧାର କରି ପାହାଡି ରାସ୍ତାରେ ୧୦ କିଲୋମିଟର ଭାରକରି ନିକଟସ୍ଥ ବୁଗୁଡା କଲୋନୀକୁ ଆଣି ଅଟୋଯୋଗେ ଦଶପଲ୍ଲା ଡାକ୍ତରଖାନାକୁ ନେଇଥିଲେ । ଡାକ୍ତର ତାଙ୍କୁ ପ୍ରାଥମିକ ଚିକିତ୍ସା ପରେ ନୟାଗଡ଼ ଜିଲ୍ଲା ମୁଖ୍ୟ ଚିକିତ୍ସାଳୟକୁ ପଠାଇ ଦେଇଥିଲେ । ଅର୍ଥାଭାବରୁ ତାଙ୍କୁ ପରିବାର ଲୋକ ନୟାଗଡ଼ ଡାକ୍ତରଖାନାକୁ ନେଇ ନ ପାରି ବୁଗୁଡା କଲୋନୀ ଗ୍ରାମରେ ରଖି ଅର୍ଥ ଯୋଗାଡରେ ଲାଗି ପଡ଼ିଛନ୍ତି । ଅର୍ଥ ଯୋଗାଡ ପରେ ଆସନ୍ତାକାଲି ନୟାଗଡ଼ ନେବାପାଇଁ ବ୍ୟବସ୍ଥା କରିବେ ବୋଲି ଆହତ ମହିଳାଙ୍କ ପୁଅ ରଂଜନ କୁମାର ପ୍ରଧାନ ସୂଚନା ଦେଇଛନ୍ତି ।