ବାଲିଗୁଡା: କନ୍ଧମାଳ ଜିଲ୍ଲା ବାଲିଗୁଡ଼ା ପୋଲିସକୁ ବଡ଼ ସଫଳତା । ସ୍ଥାନୀୟ ହନୁମାନ ମନ୍ଦିର ନକଟରୁ ବ୍ରାଉନ୍ ସୁଗାର ସହ ଦୁଇ ମାଫିଆ ଗିରଫ କରିଛି ପୋଲିସ । ସେମାନଙ୍କ ନିକଟରୁ ୫ଗ୍ରାମ୍ ବ୍ରାଉନ୍ ସୁଗାର୍ ଜବତ କରିଛି ପୋଲିସ୍ । ବାଲିଗୁଡ଼ା ଏସଡିପିଓ ଜି.ରାଘବେନ୍ଦ ରେଡ୍ଡୀଙ୍କ ନେତୃତ୍ୱରେ ଏକ ସ୍ୱତନ୍ତ୍ର ଟିମ୍ ଚଢ଼ାଉ କରି ବ୍ରାଉନ ସୁଗାର ମାଫିଆଙ୍କୁ ଧରିବାରେ ସକ୍ଷମ ହୋଇଛି ପୋଲିସ୍ । ଗିରଫ ଦୁଇଜଣଙ୍କ ମଧ୍ୟରୁ ଜଣେ ଭୁବନେଶ୍ୱର ସୁନ୍ଦରପଦା ଅଞ୍ଚଳର ଇମ୍ରାନ ଖାନ (୨୨) ଓ ଅନ୍ୟ ଜଣକ ବାଲିଗୁଡ଼ା ଥାନା ଡୁମୁଡ଼ିସାହି ଅଞ୍ଚଳର ଶେଖ୍ ନୟାବ ଅକ୍ତର ହୋଇଥିବା ପୋଲିସ୍ ପକ୍ଷରୁ ସୂଚନା ମିଳିଛି । ଅତିରିକ୍ତ ତହସିଲଦାର ବିରେନ୍ଦ୍ର ତ୍ରିପାଠୀଙ୍କ ଉପସ୍ଥିତିରେ ୫ ଗ୍ରାମ ବ୍ରାଉନ ସୁଗାର ଜବତ କରି କେସ ନଂ-୨୦୫/୨୨ରେ ଏକ ମାମଲା ରୁଜୁ କରି ତଦନ୍ତ ଚଳାଇଛି ବାଲିଗୁଡ଼ା ପୋଲିସ୍ । ସୂଚନା ପ୍ରକାରେ ଦୀର୍ଘ ଦିନରୁ ବାଲିଗୁଡ଼ା ଅଞ୍ଚଳରେ ବ୍ରାଉନ୍ ସୁଗାର କାରବାର ହେଉଥିବା ଖବରପାଇ କାରବାରରେ ସମ୍ପୃକ୍ତ ମାଫିଆଙ୍କୁ ଧରିବାକୁ ଜାଲ ବିଛାଇଥିଲା ପୋଲିସ୍ ।