ସମ୍ବଲପୁର: ସ୍ଥାନୀୟ ଗଙ୍ଗାଧର ମେହେର ବିଶ୍ୱବିଦ୍ୟାଳୟ ଦ୍ୱାରା ଆୟୋଜିତ ଏକ ବହୁ ପ୍ରାନ୍ତୀୟ ସାହିତ୍ୟ ସମ୍ପାନରେ ଆସାମୀରୁ ଓଡ଼ିଆରେ ଅନୁବାଦିତ କ୍ଷୁଦ୍ରଗଳ୍ପ ସଂକଳନ “ଜେଜେମାଙ୍କ ଗପପେଡି’ ଆଜି ଉନ୍ମୋଚିତ ହୋଇଯାଇଛି । ଆସାମରେ ସାହିତ୍ୟ ରଥୀ ରୂପେ ପରିଚିତ ପ୍ରଖ୍ୟାତ ସାହିତ୍ୟିକ ସ୍ୱଲକ୍ଷ୍ମୀନାଥ ବେଜବରୁଆ ଦ୍ୱାରା ରଚିତ ଏହି କ୍ଷୁଦ୍ରଗଳ୍ପ ସଂକଳନକୁ ଓଡ଼ିଶାରେ ଅନୁବାଦ କରିଛନ୍ତି ଶ୍ରୀମତୀ ନିର୍ମାଳୀ ମୋହନ୍ତ । ନିଜ ପରିଚୟ ଦେଇ ସେ କହିଲେ ଯେ ଆସାମର ଝିଅ ଓ ଓଡ଼ିଶାର ବୋହୂ ଭାବେ ଏହି ବହିର ରଚନା କରି ସେ ଆଜି ଗର୍ବିତ । ସେ ଏକଦା ବ୍ୟାଙ୍କ କର୍ମଚାରୀ ଥିଲେ ଓ ଆଜି ବର୍ତ୍ତମାନ ଜଣେ ଗୃହିଣୀ ରୂପେ ଏହା ତାଙ୍କର ପ୍ରଥମ ସାହିତ୍ୟ କୃତି । ପୁସ୍ତକଟିକୁ ଉନ୍ମୋଚିତ କରି ଗଙ୍ଗାଧର ମେହେର ବିଶ୍ୱବିଦ୍ୟାଳୟ କୁଳପତି ପ୍ରୋ.ଏନ ନାଗରାଜୁ କହିଲେ ଏହା ହେଉଛି ତାଙ୍କ ବିଶ୍ୱବିଦ୍ୟାଳୟ ଦ୍ୱାରା ପ୍ରକାଶିତ ପ୍ରଥମ ପୁସ୍ତକ ଓ ଏହି ଧାରା ଆଗକୁ ଜାରି ରହିବ । ଏହି ବିଶ୍ୱବିଦ୍ୟାଳୟରେ ପ୍ରତିଷ୍ଠିତ ଭୀମ ଭୋଇ ଅନୁସନ୍ଧାନ ଚେୟାର ଅଧ୍ୟକ୍ଷ ପ୍ରୋ ପ୍ରଦୀପ କୁମାର ପଣ୍ଡା ଆଜିକାର ସଭାର ସଞ୍ଚାଳନ କରିଥିଲେ । ଏହି ସଭାକୁ ଆଭାସୀ ମାଧ୍ୟମରେ ଆସାମ ସାହିତ୍ୟ ସଭା ସଭାପତି ପୁଲସ୍ତ୍ୟ ସାଇକିଆ ସମ୍ବୋଧିତ କରି କହିଲେ ଯେ ସେ ଆସାମର ସାହିତ୍ୟ ରଥୀଙ୍କ ଦ୍ୱାରା ରଚିତ ଏହି ପ୍ରସିଦ୍ଧ ପୁସ୍ତକର ଓଡ଼ିଆ ଅନୁବାଦ ଉନ୍ମୋଚନ ସଭାକୁ ସମ୍ବୋଧିତ କରି ସେ ଅତି ଗର୍ବିତ । ସେହିପରି କର୍ଣ୍ଣାଟକ ସାହିତ୍ୟ ଏକାଡେମୀ ସଭାପତି ପ୍ରଶାନ୍ତ କୁମାର ନିଜ ଅନଲାଇନ ସମ୍ବୋଧନରେ କହିଲେ ଅନୁବାଦ ସାହିତ୍ୟ ବାସ୍ତବରେ ବିଭିନ୍ନ ଭାଷାଭାଷୀ ରାଜ୍ୟଙ୍କ ମଧ୍ୟରେ ଏକ ସେତୁ ପରି କାର୍ଯ୍ୟ କରିଥାଏ ଓ ଏହି ସାହିତ୍ୟ ଧାରା ଆଗକୁ ଅବ୍ୟାହତ ରହିବା ଉଚିତ । ଓଡ଼ିଆ ସାହିତ୍ୟ ଏକାଡେମୀ ଅଧ୍ୟକ୍ଷ ଡ଼ଃ ହୃଷିକେଶ ମଲ୍ଲିକ ମଧ୍ୟ ଅନଲାଇନ ଜରିଆରେ ଏହି ସଭାକୁ ସମ୍ବୋଧିତ କରି ସାଧୁବାଦ ଜଣାଇଥିଲେ । ସେ କହିଲେ ଆଜିର ଏହି ମହାନ ସାହିତ୍ୟ ସମାବେଶର ସଫଳ ଆୟୋଜନ ପାଇଁ ଗଙ୍ଗାଧର ମେହେର ବିଶ୍ୱବିଦ୍ୟାଳୟ ପ୍ରତି ସାଧୁବାଦ ଜଣାଉଛନ୍ତି ଓ ଆଗକୁ ଏପରି ଅନେକ ସାହିତ୍ୟ ସମାବେଶର ଆଶା କରନ୍ତି । ଏହି ଅବସରରେ ଐତିହାସିକ ଦୀପକ କୁମାର ପଣ୍ଡା ମଧ୍ୟ ମଞ୍ଚାସୀନ ରହି ସଭାକୁ ସମ୍ବୋଧିତ କରିଥିଲେ ଓ ବେଜବରୁଆଙ୍କ ବିଷୟରେ ସମ୍ୟକ ସୂଚନା ଦେଇଥିଲେ । ବିଶ୍ୱବିଦ୍ୟାଳୟ କୁଳସଚିବ ଯୁଗଳେଶ୍ୱରୀ ଦାସ ମଞ୍ଚାସୀନ ରହି ଉକ୍ତ ପୁସ୍ତକର ମୂଳ ଲେଖକ ଓ ଅନୁବାଦକଙ୍କ ସଂକ୍ଷିପ୍ତ ପରିଚୟ ପ୍ରଦାନ କରିଥିଲେ । ଉପକୁଳସଚିବ ଉମାଚରଣ ପତି ସଭାର ପ୍ରାରମ୍ଭିକ ସୂଚନା ଓ ଶେଷରେ ଧନ୍ୟବାଦ ଅର୍ପଣ କରିଥିଲେ ।