ଦଶପଲ୍ଲା : ଗତକାଲି ଅପରାହ୍ନରେ ଦଶପଲ୍ଲା ବ୍ଲକ ମଧ୍ୟଖଣ୍ଡ ମହାଦେବ ମନ୍ଦିର ନିକଟସ୍ଥ ଏକ ପଡିଆରୁ ଗଣିଆ ବନ ବିଭାଗ ପକ୍ଷରୁ ଚଢ଼ାଉ କରାଯାଇ ବିପୁଳ ପରିମାଣର କାଠ ଗଣ୍ଡି ଜବତ କରାଯାଇଛି ।ଏହି ଜବତ କାଠ ଗଣ୍ଡି ମଧ୍ୟରେ ୨୭ ଖଣ୍ଡ ଶାଗୁଆନ ଗଣ୍ଡି ଓ ୨୩ ଟି ଶାଳ ଗଣ୍ଡି ଥିବା ଜଣାପଡ଼ିଛି । ଜବତ କାଠ ଗଣ୍ଡିର ମୂଲ୍ୟ ୫ ଲକ୍ଷ ଟଙ୍କାରୁ ଉଦ୍ଧ୍ୱର୍ ହେବ ବୋଲି ଗଣିଆ ବନ ବିଭାଗ ସୂତ୍ରରୁ ଜଣାପଡ଼ିଛି । ଏହି ଘଟଣାରେ ଗଣିଆ ବନ ବିଭାଗ ପକ୍ଷରୁ ଏକ ମୋକଦ୍ଦମା ରୁଜ୍ଜୁ କରାଯାଇ କାଠଗଣ୍ଡି ଜବତ କରାଯାଇଥିବା ବେଳେ ଏହି ଘଟଣାରେ ବନ ବିଭାଗ ପକ୍ଷରୁ କାହାକୁ ଗିରଫ କରାଯାଇ ନାହିଁ । ମାତ୍ର ଏହି କାଠ କିଏ ଆଣିଲା ଓ ଏଠାକୁ କାଠ କିପରି ଆସିଲା ସେ ନେଇ ଗଣିଆ ବନ ବିଭାଗ ପକ୍ଷରୁ ତଦନ୍ତ ଜାରି ରହିଥିବା ବେଳେ ଏହି ଚଢ଼ାଓରେ ଗଣିଆ ରେଞ୍ଜର ସୋନାଲି ସିଓ , ଦଶପଲ୍ଲା ଓ ଗଣିଆ ବନ କର୍ମଚାରୀ ସହ ନୟାଗଡ଼ ମୋବାଇଲ ଷ୍ଟାଫ , ଦଶପଲ୍ଲା ପୋଲିସ ସାମିଲ ହୋଇଥିଲେ ।