ଘୁ.ଉଦୟଗିରି:ସ୍ଥାନୀୟ ଥାନା ଅନ୍ତର୍ଗତ କଳିଙ୍ଗା ପଞ୍ଚାୟତର ନନ୍ଦଗିରି ଗ୍ରାମର ଜଣେ ନାବାଳିକାକୁ ଦୁଷ୍କର୍ମ ହୋଇଥିବା ନେଇ ପରିବାର ଲୋକେ ଥାନାରେ ଲିଖିତ ଏତଲା ଦେବା ପରେ ଏକ ବଳାତ୍କାର ମାମଲା ରୁଜୁ ହୋଇଥିବା ସୂଚନା ମିଳିଛି । ପ୍ରାପ୍ତ ସୂଚନାନୁସାରେ ୫ ତାରିଖ ରାତି ପ୍ରାୟ ୧୨ ଟା ସମୟରେ ନନ୍ଦଗିରି ଗ୍ରାମର ଜଣେ ନାବାଳିକା ନିଜ ଘର ସମ୍ମୁଖରେ ପରିସ୍ରା ନିମନ୍ତେ ଯାଇଥିବା ବେଳେ ପଡ଼ିଶା ଘରର ଏକ ବିବାହିତ ଯୁବକ ନାବାଳିକାଙ୍କୁ ଜୋର ଜବରଦସ୍ତ କିଛି ନିଶା ଦ୍ରବ୍ୟ ସୁଙ୍ଘେଇ କିଛି ଦୂରକୁ ନେଇଯିବା ସହ ଦୁଷ୍କର୍ମ କରିଥିବା ନେଇ ପୀଡ଼ିତାଙ୍କ ପରିବାର ତରଫରୁ ଥାନାରେ ଏତଲା ଦିଆଯାଇଛି । ଝିଅ ଘରକୁ ଫେରିବା ବିଳମ୍ବ ହେବାରୁ ପରିବାର ଲୋକୋ ଖୋଜା ଖୋଜି କରିବା ବେଳେ ଅନ୍ୟ ଏକ ଘର ପଛ ପଟରୁ ନିଜ ଝିଅକୁ ଉଦ୍ଧାର କରିଥିଲେ । ଘରକୁ ଯାଇ ଝିଅ ଘଟଣା ବିଷୟରେ ନିଜ ବାପା ମାଁ ଙ୍କୁ କହିଥିଲେ । ଏହାପରେ ସାହି ପଡିଶା ଲୋକ ଘଟଣା ବିଷୟରେ ଜାଣିବା ପରେ ଆଜି ସେ ବିଷୟକୁ ନେଇ ପରିବାର ଲୋକେ ଥାନାରେ ଜଣେଇଥିଲେ ଓ ଲିଖିତ ଏତଲା ଦେବା ପରେ ସ୍ଥାନୀୟ ପୋଲିସ ଅଭିଯୁକ୍ତଙ୍କୁ ଖୋଜାଖୋଜି କରିଥିଲେ କିନ୍ତୁ ଅଭିଯୁକ୍ତ ଫେରାର ଥିବାରୁ ଗିରଫ ହୋଇନଥିବା ସୂଚନା ମିଳିଛି । ପୀଡ଼ିତାଙ୍କ ପରିବାର ତରଫରୁ ଏକ ଲିଖିତ ଏତଲା ଦେବା ପରେ ଥାନା ଆଇଆଇସି ଅଜୟ କୁମାର ସ୍ୱାଇଁ ଥାନା କେଶ ନଂ ୨/୨୩ ଧାରା ୩୭୬ ରେ ମାମଲା ରୁଜୁ କରି ଦୁଷ୍କର୍ମ ଶିକାର ହୋଇଥିବା ନାବାଳିକାର ଡାକ୍ତରୀ ମାଇନା ସ୍ଥାନୀୟ ସରକାରୀ ସ୍ୱାସ୍ଥ୍ୟ କେନ୍ଦ୍ର ଠାରେ କରାଯାଇଥିବା ସୂଚନା ମିଳିଥିବା ବେଳେ ଅଭିଯୁକ୍ତକୁ ଗିରଫ କରିବା ପାଇଁ ପୋଲିସ ତଦନ୍ତ ଆରମ୍ଭ କରିଥିବା ସୂଚନା ମିଳିଛି ।