ନୂଆପଡ଼ା : ନୂଆପଡା ଜିଲା କୋମନା ଥାନା ଅନ୍ତର୍ଗତ ପଲସିପାଣି ପଞ୍ଚାୟତ ବାଞ୍ଚିବାହାଲ ଛକଠାରେ ୩୫୩ ନମ୍ବର ଜାତୀୟ ରାଜପଥ ଉପରେ ଟ୍ରକ୍ ଓ ବାଇକ୍ ମୁହାଁମୁହିଁ ଧକ୍କାରେ ଜଣଙ୍କର ମୃତ୍ୟୁ ଘଟିଥିବା ବେଳେ ଅନ୍ୟଜଣେ ଗୁରୁତର ଆହତ ହୋଇଥିବା ସୂଚନା ମିଳିଛି । ମୃତକ ହେଲେ ଖଡିଆଳ ଥାନା ଖୁଦପେଜ ପଞ୍ଚାୟତ ଖଇରପଦର ଗାଁର ମୋତିରାମ ଦୁରିଆ (୧୯) । ସାଙ୍ଗରେ ଥିବା ଅନ୍ୟ ଜଣେ ଜଗଦୀଶ ବାଗ (୧୯) ଗୁରୁତର ଅବସ୍ଥାରେ ରାୟପୁର ସ୍ଥାନାନ୍ତର ହୋଇଛନ୍ତି । ପ୍ରାପ୍ତ ସୂଚନା ମତେ ଖଇରପଦର ଗାଁରୁ ବାହାରି ନୂଆପଡା କିଛି କାମରେ ବାଇକ୍ (ନଂ.ଓଡି୧୫ଏଲ ୬୮୭୪)ରେ ୨ଜଣ ଯୁବକ ନୂଆପଡା ପଟେ ଆସୁଥିଲେ । ନୂଆପଡା ପଟୁ ଯାଉଥିବା ଟ୍ରକ୍ (ନଂ.ସିଜି ଠ୬ଜିଡି୭୭୩୨) ସହବାଞ୍ଜିବାହାଲ ଛକଠାରେ ୩୫୩ ନମ୍ବର ଜାତୀୟ ରାଜପଥ ଉପରେ ମୁହାଁମୁହିଁ ଧକ୍କା ହୋଇଥିଲା । ଘଟଣାସ୍ଥଳରେ ବାଇକ ଆରୋହୀ ମୋତିରାମଙ୍କ ମୃତ୍ୟୁ ହୋଇଥିବା ବେଳେସାଙ୍ଗରେ ଥିବା ଜଗଦୀଶ ଗୁରୁତ ଆହତ ହୋଇଛନ୍ତି । ତରବୋଡ ଫାଣ୍ଡି ପୋଲିସ ଘଟଣାସ୍ଥଳରେ ପହଞ୍ଚି ଆହତଙ୍କୁ ଉଦ୍ଧାର କରି ନୂଆପଡା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରିଥିଲେ । ଅବସ୍ଥା ଗୁରୁତର ହେବାରୁ ରାୟପୁର ସ୍ଥାନାନ୍ତର କରାଯାଇଛି । ମୃତଦେହ ପୋଲିସ ବ୍ୟବଚ୍ଛେଦ ପରେ ପରିବାର ଲୋକଙ୍କୁ ହସ୍ତାନ୍ତର କରିଛି । ଏ ନେଇ ଏକ ଅପମୃତ୍ୟୁ ମାମଲା ରୁଜୁ କରି କରି ଅଧିକ ତଦନ୍ତ କରାଯାଉଛି ବୋଲି ଫାଣ୍ଡି ଅଧିକାରୀ ରାମଲାଲ ଜୁରିଆ ସୂଚନା ଦେଇଛନ୍ତି ।