ସୁବର୍ଣ୍ଣପୁର: ଜିଲ୍ଲା ଅବକାରୀ ବିଭାଗ ଆଜି ପୁଣି ଏକ ଗଂଜେଇ ବୋଝେଇ ଗାଡି ସହିତ ତିନିଜଣ ଗଂଜେଇ ବେପାରୀକୁ ଗିରଫ କରିବାରେ ସଫଳ ହୋଇଛି । ଆଜି ପାହାନ୍ତିଆରୁ ବୌଦ୍ଧ ଜିଲ୍ଲାର ଶଗଡା ଅଂଚଳରୁ ଏକ ଗଂଜେଇ ବୋଝେଇ ମହିନ୍ଦ୍ରା ଗାଡି ସୁବର୍ଣ୍ଣପୁର ସହର ପାର ହୋଇ ବିନିକା ରାସ୍ତାରେ ଯାଉଥିବା ବେଳେ ଅବକାରୀ ବିଭାଗର କର୍ମଚାରୀମାନେ ଗାଡି ଉପରେ ଚଢାଉ କରିଥିଲେ । ଗାଡିଟି ବାହାର ପ୍ରଦେଶ ନମ୍ବର ଥିବା ବେଳେ ଗାଡିଟି ଦ୍ରୁତ ଗତିରେ ଯାଉଥିବା ଯୋଗୁଁ ଅବକାରୀ କର୍ମଚାରୀମାନେ ସଂଦେହ କରି ଗାଡିଟିକୁ ଅଟକାଇଥିଲେ । ଗାଡି ତଲାସୀ କରିବାରେ ଦୁଇଟି ଜରିବସ୍ତାରେ ଗଂଜେଇ ଥିବା ଦେଖିବାକୁ ପାଇଥିଲେ ।ଦୁଇଟି ଜରିବସ୍ତାରେ ୩୦ କେଜି ଗଂଜେଇ ଚୋରା ଚାଲାଣ କରି ନେଉଥିବା ଜଣା ପଡିଥିଲା । ତେବେ ଅବକାରୀ କର୍ମଚାରୀମାନେ ଗଂଜେଇ ବୋଝେଇ ଗାଡି ସହିତ ତିନି ଜଣ ଆନ୍ତଃ ରାଜ୍ୟ ଗଂଜେଇ ବେପାରୀଙ୍କୁ ଗିରଫ କରିଛନ୍ତି । ଗିରଫ ସୋନି କୁମାର ,ମୁକେଶ କୁମାର ଦୁଇ ଜଣ ବେପାରୀ ବିହାର ପ୍ରଦେଶର ହୋଇଥିବା ବେଳେ ଗିରଫ ଅନ୍ୟଜଣେ ଅଭିଯୁକ୍ତ ଅନିଲ ପାଣ୍ଡେ ଝାରଖଣ୍ଡ ପ୍ରଦେଶର ବୋଲି ଜିଲ୍ଲା ଅବକାରୀ ଅଧିକ୍ଷୀକା ସୁମତି ତ୍ରିପାଠୀ ସୂଚନା ଦେଇଛନ୍ତି । ଗିରଫ ଅଭିଯୁକ୍ତମାନଙ୍କୁ ଆଜି କୋର୍ଟ ଚାଲାଣ କରାଯାଇଛି ।