ପୁରୀ : ପୁରୀରେ ବିଭତ୍ସ ହତ୍ୟାକାଣ୍ଡ । ପୁରୀ ଉପର ମାଳିସାହି ସ୍ଥିତ ତାତାମ୍ବରୀ ଆଖଡ଼ା ମଠ ନିକଟରେ ଆଜି ଘଟିଛି ପରିବାରିକ କଳହରେ ଜଣକ ମୁତ୍ୟୁ ହେବା ସହ ଅନ୍ୟ ଚାରି ଜଣ ଆହତ ହୋଇଛନ୍ତି । ସୂଚନା ଅନୁଯାଇ ନୃସିଂହ ମହାନ୍ତି ନିଜ ପତ୍ନୀଙ୍କ ସହ ପୂର୍ବରୁ ବିବାଦ ଲାଗିଥିବା ବେଳେ ଆଜି ଘଟିଛି ଅଭାବନୀୟ ଘଟଣା । ନୃସିଂହ ମହାନ୍ତି ଓରଫ ପୋଡା ସୋନୁ ନିଜ ସ୍ତ୍ରୀକୁ ବିଭିନ୍ନ ସମୟରେ ମାରପିଟ କରିଥାନ୍ତି,ଏହାକୁ ସହି ନ ପାରି ପୋଡା ସୋନୁର ସ୍ତ୍ରୀ ନିଜ ବାପ ଘରୁକୁ ଚାଲିଯାଇଥିଲେ । ତେବେ ଆଜି ବାପ ଘର ଲୋକେ ଘଟଣାର ବୁଝାସୁଝା କରିବା ଲାଗି ନୃସିଂହ ଘରକୁ ଯାଇଥିବା ବେଳେ ସେଠାରେ ଉଭୟଙ୍କ ମଧ୍ୟରେ କଳହ ସୃଷ୍ଟି ହୋଇଥିଲା । ଯାହାଫଳରେ କି ନୃସିଂହ ଓରଫ ପୋଡା ସୋନୁ ଉତ୍କ୍ଷିପ୍ତ ହୋଇ ଏକା ସାଙ୍ଗରେ ୫ଜଣକୁ ଆକ୍ରମଣ କରିଥିଲା,ଯେଉଁଥିରେ କି ଆକ୍ରମଣକାରୀ ସୋନୁର ଛୁରା ମାଡରେ ପୁତୁରା ସୌମ୍ୟରଞ୍ଜନ ପ୍ରଧାନଙ୍କ ମୃତ୍ୟୁ ଘଟିଛି । ଏହି ଆକ୍ରମଣରେ ନୃସିଂହର ଶାଶୁ, ସ୍ତ୍ରୀ, ଦେଢ଼ଶାଶୁ ଆହତ ଥିବା ବେଳେ ଗୁରୁତର ଆହତ ସଢୁ ସୁକାନ୍ତ ପ୍ରଧାନଙ୍କ ପେଟରେ ଗଭୀର ଆଘାତ ଲାଗିଥିବାରୁ ତାଙ୍କୁ କଟକ ସ୍ଥାନାନ୍ତରଣ କରାଯାଇଛି । ସେପଟେ ଘଟଣା ସ୍ଥଳରେ କୁମ୍ଭାରପଡା ଥାନା ପୋଲିସ ପହଂଚି ତଦନ୍ତ ଆରମ୍ଭ କରିବା ସହ ସାଇଣ୍ଟିଫିକ ଟିମ ଦ୍ୱାର ରକ୍ତ ନମୁନା ସଂଗ୍ରହ କରାଯାଇଛି । ଆକ୍ରମଣ କରିଥିବା ନୃସିଂହ ମହାନ୍ତି ଓରଫ ପୋଡା ସୋନୁ ଫେରାର ରହିଥିବା ଜଣାପଡିଛି । ଘଟଣାକୁ ଗୁରୁତର ସହ ନେଇ ପ୍ରାଥମିକ ତଦନ୍ତ ଆରମ୍ଭ ହୋଇଥିବା କହିଛନ୍ତି କୁମ୍ଭାରପଡା ଥାନା ଅଧିକାରୀ ।