ହରଭଙ୍ଗା : ଆଜି ହେଉଛି ଚିତ୍ର ମାସର ପବିତ୍ର ମହାବିଷୁଭ ସଂକ୍ରାନ୍ତି ଓ ହନୁମାନ ଜୟନ୍ତୀ । ଶ୍ରୀରାମ ଭକ୍ତ ମହାବଳି ହନୁମାନ ଜୟନ୍ତୀ ଅବସରରେ ଆଜି ବୌଦ୍ଧ ଜିଲ୍ଲାର ହରଭଙ୍ଗା ବ୍ଲକ ବାଣିଭୂଷଣପୁର ପଞ୍ଚାୟତ ଠିଡିକାଜୋର ଗ୍ରାମର ଜଗନ୍ନାଥ ମନ୍ଦିର ପ୍ରାଙ୍ଗଣରେ ନୂତନ ହନୁମାନଙ୍କ ମନ୍ଦିର ପ୍ରତିଷ୍ଠା ଉତ୍ସବ ପାଳିତ ହୋଇଯାଇଛି । ଏହି ପ୍ରତିଷ୍ଠା ଉତ୍ସବ ଅବସରରେ ପ୍ରଥମେ ସକାଳର ପୂଜାର୍ଚ୍ଚନା ପରେ ଭକ୍ତମାନେ ସଙ୍କଟମୋଚନ ଶ୍ରୀ ହନୁମାନଙ୍କ ଗଦାକୁ ଚାରିଛକ ଓ ପୁରୁଣାକଟକର ବିଭିନ୍ନ ଗ୍ରାମ ଗୁଡିକରେ ପରିକ୍ରମା କରାଇଥିଲେ । ଏହି ପରିକ୍ରମାରେ ଶ୍ରୀରାମ ଓ ବଜରଙ୍ଗବଲି ଭକ୍ତ ଯୋଗ ଦେଇଥିଲେ । ପରେ ନୂତନ ମନ୍ଦିର ପ୍ରାଙ୍ଗଣରେ ହନୁମାନ ଚାଳିଶା ପାଠ ସହ ନାମଯଜ୍ଞ ଅନୁଷ୍ଠିତ ହୋଇଥିବା ନେଇ ମନ୍ଦିର ପରିଚାଳନା କମିଟି ପକ୍ଷରୁ ସୂଚନା ମିଳିଛି ।