ସୁବର୍ଣ୍ଣପୁର :ଜିଲ୍ଲା ସଦର ମହକୁମା ବ୍ଲକ ଛକଠାରେ ଥିବା ସୁବର୍ଣ୍ଣା ନାରୀ ଜାଗରଣ କେନ୍ଦ୍ର କାର୍ଯ୍ୟାଳୟ ପରିସରରେ ସୁବର୍ଣ୍ଣା ଏବଂ ସୁବର୍ଣ୍ଣପୁର ଗାୟତ୍ରୀ ପରିବାରର ମିଳିତ ଆନୁକୂଲ୍ୟରେ ବିଶ୍ୱ ମହିଳା ଦିବସ ପାଳିତ ହୋଇଯାଇଛି । ଏହି ସମାରୋହରେ ହୋଲିକା ଦହନ ସହ ଦୀପ ମହାଯଜ୍ଞର ଆୟୋଜନ କରାଯାଇଥିଲା । ସୁବର୍ଣ୍ଣାର ସଭାନେତ୍ରୀ ପ୍ରାଧ୍ୟାପିକା ମୀନା ମହାରଣାଙ୍କ ଅଧ୍ୟକ୍ଷତାରେ ପାଳିତ ଏହି ମହିଳା ଦିବସ ମହା ସମାରୋହରେ ସଂପନ୍ନ ହୋଇଯାଇଛି । ଏଥିରେ ଜିଲ୍ଲା ଆଇନ ସେବା ପ୍ରାଧିକରଣ ସଂପାଦିକା କୁମୁଦିନୀ ମୁଦୁଲି ମୁଖ୍ୟ ଅତିଥି ଭାବେ ଯୋଗଦେଇ ସମାଜର ପ୍ରଗତି ନିମନ୍ତେ ନାରୀ ଶକ୍ତିର ଆବଶ୍ୟକତା ଉପରେ ଆଲୋକପାତ କରିଥିଲେ । ଅଧ୍ୟକ୍ଷା ମୀନା ମହାରଣା ବିଶ୍ୱ ମହିଳା ଦିବସ ପାଳନର ତାତ୍ପର୍ଯ୍ୟ ସଂପର୍କରେ ନାନା ଉଦାହରଣ ଦେଇ ବକ୍ତବ୍ୟ ପ୍ରଦାନ କରିଥିଲେ । ଏଥିରେ ସୁବର୍ଣ୍ଣପୁର ପୌର ପରିଷଦର ଅଧ୍ୟକ୍ଷା ତାମସୀ ତାମସ୍ମିତା ନାୟକ ସମ୍ମାନିତ ଅତିଥିଭାବେ ଯୋଗଦେଇ ମହିଳା ଦିବସ ପାଳନର ଉଦ୍ଦେଶ୍ୟ ସଂପର୍କରେ ଉଲ୍ଲେଖ କରିଥିଲେ । ଜିଲ୍ଲା ଗୟତ୍ରୀ ପରିବାର ମହିଳା ମଣ୍ଡଳ ସଂଚାଳିକା ଭଗବତୀ ରାୟଗୁରୁ ଅନ୍ୟତମ ସମ୍ମାନିତ ଅତିଥିଭାବେ ଯୋଗଦେଇ ସମାଜ ଗଠନରେ ନାରୀଶକ୍ତିର ଭୂମିକା ସଂପର୍କରେ ନିଜର ବକ୍ତବ୍ୟ ରଖିଥିଲେ । ସୁବର୍ଣ୍ଣାର ସଂପାଦିକା ମଂଜୁଳା ମିଶ୍ର ପ୍ରାରମ୍ଭିକ ସୂଚନା ଦେବାସହ ବିବରଣୀ ଉପସ୍ଥାପନା କରିଥିଲେ । ଏହି ଉପଲକ୍ଷେ ସୁବର୍ଣ୍ଣାର ସଭ୍ୟାମାନେ ହୋଲି ଖେଳିବାସହ ହୋଲିକା ଦହନ କରିଥିଲେ । ସୁବର୍ଣ୍ଣାର ସୁରଭି ବିଶିଙ୍କୁ ସମ୍ବର୍ଦ୍ଧିତ କରିବା ସହ ମୋକ୍ଷଦା ଶର୍ମା ସଂଗୀତ ପରିବେଷଣ କରିଥିଲେ । ଶେଷରେ ସୁନନ୍ଦା ସାହୁ ଧନ୍ୟବାଦ ଅର୍ପଣ କରିଥିଲେ ।