ପାରଳାଖେମୁଣ୍ଡି : ନୂତନ ଭାବେ ଗଜପତି ଜିଲ୍ଲାରେ ଜିଲ୍ଲାପାଳ ଭାବେ ଯୋଗଦେଇଥିବା ସ୍ମୃତି ରଞ୍ଜନ ପ୍ରଧାନଙ୍କ ନିର୍ଦ୍ଦେଶ କ୍ରମେ ଜିଲ୍ଲାରେ ଥିବା ଶିଶୁ ଯତ୍ନ ଅନୁଷ୍ଠାନର ଅନ୍ତେବାସୀମାନେ ଗତକାଲି ରଥଯାତ୍ରା ବୁଲିବା ପାଇଁ ଯାଇଥିଲେ । ଶିଶୁମାନେ ପ୍ରଥମେ ଗୁଣ୍ଡିଚା ମନ୍ଦିରରେ ପହଞ୍ଚି ଜଗନ୍ନାଥ ଦର୍ଶନ କରିଥିଲେ ଏବଂ ପରେ ପ୍ରଶାସନ ଦ୍ୱାରା ଆୟୋଜନ କରାଯାଇଥିବା ଜଗନ୍ନାଥଙ୍କର ଆଡ଼ପ ଘର ପ୍ରସାଦସେବନ କରିଥିଲେ ।
ଏହାପରେ ଦୁଇଟି ଅନୁଷ୍ଠାନ ଯଥା ଶ୍ରୀ ଜଗନ୍ନାଥ ନିକେତନ, ଆର୍. ସୀତାପୁର ଏବଂ ପ୍ରାଉଡ଼, ବି.ସୀତାପୁରର ୬୦ ଜଣ ମାତୃପିତୃହୀନ ଶିଶୁ ରଥଯାତ୍ରାରେ ଲାଗିଥିବା ମୀନାବଜାର ବୁଲି ଦେଖିବା ସହିତ ଦୋଳିରେ ବସି ବେଶ୍ ମଜା ନେଇଥିଲେ । ରଥଯାତ୍ରା ଏବଂ ମୀନାବଜାର ବୁଲି ଦେଖିବା ବେଳେ ଶିଶୁମାନେ ବେଶ୍ ଖୁସି ଥିବା ଲକ୍ଷ୍ୟ କରାଯାଇଥିଲା ।
ଏହି କାର୍ଯ୍ୟକ୍ରମକୁ ଜିଲ୍ଲା ଶିଶୁ ସୁରକ୍ଷା ୟୁନିଟ୍ ର କର୍ମଚାରୀ ଏବଂ ଶିଶୁ ଯତ୍ନ ଅନୁଷ୍ଠାନର କର୍ମକର୍ତ୍ତା ପରିଚାଳନା କରିଥିଲେ ।