ଦଶପଲ୍ଲା : ଆଜି ଅଗଷ୍ଟ ୮ ତାରିଖ ଦିନ ସିଆଇଟିୟୁ ,ଅଖିଳ ଭାରତ କୃଷକ ସଭା ଓ ଅଖିଳ ଭାରତ କ୍ଷେତ ମଜଦୂର ୟୁନିଆନ ପକ୍ଷରୁ ଦଶପଲ୍ଲାରେ ଆଇନ ଅମାନ୍ୟ ଆନ୍ଦୋଳନ ଅନୁଷ୍ଠିତ ହୋଇଯାଇଛି । ଦରଦାମ ବୃଦ୍ଧି ବିରୁଦ୍ଧରେ, ବେକାରଙ୍କୁ ନିଯୁକ୍ତି, ଠିକା ଶ୍ରମିକ ମାନଙ୍କୁ ଓ ଆଉଟ୍ ସୋର୍ଶିଂ ନିଯୁକ୍ତ ମାନଙ୍କୁ ସ୍ଥାୟୀ କରିବା, ନିତ୍ୟ ବ୍ୟବହାର୍ଯ୍ୟ ଜିନିଷ ଉପରୁ ଜିଏସଟି ପ୍ରତ୍ୟାହାର, କୃଷିଜାତ ଜିନିଷର ସର୍ବ ନିମ୍ନ ମୂଲ୍ୟ ପାଇଁ ଆଇନ କରିବା, କୃଷି ଋଣ ଛାଡ କରିବା, ସ୍କିମ ୱର୍କର ମାନଙ୍କୁ ସରକାରୀ କର୍ମଚାରୀର ମାନ୍ୟତା, ସରକାରୀ ଉଦ୍ୟୋଗ ଗୁଡ଼ିକୁ ଘରୋଇ କମ୍ପାନୀକୁ ଦେବା ବନ୍ଦ କରିବା, ବାସହୀନ ମାନଙ୍କୁ ଘରଡିହ ଏବଂ ବାସଗୃହ ଯୋଗାଇ ଦେବା, ମନରେଗା ଯୋଜନାରେ ବର୍ଷକୁ ୨୦୦ ଦିନ କାମ ଓ ୭୦୦ ଟଙ୍କା ମଜୁରୀ ଇତ୍ୟାଦି ଦାବି ନେଇ ଏକ ଶୋଭାଯାତ୍ରା ଦଶପଲ୍ଲା ବ୍ଲକ ଛକରୁ ବାହାରି ତହସିଲ ଅଫିସକୁ ଯାଇଥିଲା । ତହସିଲ ଅଫିସ୍ ଠାରେ ଆନ୍ଦୋଳନକାରୀମାନେ ପୋଲିସ କଡନ ଭାଙ୍ଗି , ଆଇନ ଅମାନ୍ୟ କରି ଗିରଫ ହୋଇଥିଲେ । ପୋଲିସ ଗିରଫ କରି ସତ୍ୟାଗ୍ରହକାରୀ ମାନଙ୍କୁ, ଥାନାକୁ ଆଣି ପୁଣି ଛାଡ଼ି ଦେଇଥିଲା । ଏହି ଆନ୍ଦୋଳନରେ ସିଆଇଟିୟୁର ଜିଲ୍ଲା ସମ୍ପାଦକ ଶରତ ଚନ୍ଦ୍ର ବେହେରା, ଜୟନ୍ତୀ ଦାସ,ସସ୍ମିତା ପଟ୍ଟନାୟକ, ସଞ୍ଜୁ ପଣ୍ଡା ଏବଂ କୃଷକ ସଭାର ବ୍ଲକ କମିଟି ସମ୍ପାଦକ ଗଣେଶ୍ୱର ନାୟକ ସଭାପତି ବ୍ରଜ ବନ୍ଧୁ ପ୍ରଧାନ,ଯୁବ ସଂଗଠନର ନେତା ସୁଶାନ୍ତ ନାୟକ, ବିପିନ୍ ବିହାରୀ ବାଜୁ ଓ ପ୍ରଦୀପ କୁମାର ନାୟକ ପ୍ରମୁଖ ନେତୃତ୍ୱ ନେଇଥିଲେ ।