ନନ୍ଦାହାଣ୍ଡି : ନନ୍ଦାହାଣ୍ଡି ବ୍ଲକ୍ ଧଣ୍ଡରା ପଞ୍ଚାୟତ ଅନ୍ତର୍ଗତ ଗୁରୁଜାନୀ ଗୁଡା ଗ୍ରାମର ଗଙ୍ଗାଧର ସୌରାଙ୍କ ପାଳ ଗଦାରେ ନିଆଁ ଲାଗିଯାଇଥିଲା । ଅସାବଧାନତା ଯୋଗୁଁ ତାଙ୍କ ଘର ବାରିପଟେ ଥିବା ପାଳ ଗଦାରେ ନିଆଁ ହୁ ହୁ ଜଳୁଥିଲା । ସ୍ଥାନୀୟ ଲୋକଙ୍କ ଉଦ୍ୟମ ବଳରେ ନିଆଁ ଲିଭାଇ ନପାରିବାରୁ ଅଗ୍ନିଶମ ବିଭାଗକୁ ସୂଚନା ଦେଇଥିଲେ । ସୂଚନା ପାଇବା କ୍ଷଣି ଦହଣା ସ୍ଥିତ ଅଗ୍ନିଶମ ବାହିନୀର କର୍ମଚାରୀମାନେ ଘଟଣାସ୍ଥଳରେ ନିଆଁକୁ ନିୟନ୍ତ୍ରଣ କରିପାରିଥିଲେ । ଗ୍ରୀଷ୍ମ ଋତୁ ହୋଇଥିବା ଯୋଗୁଁ ଆଖପାଖ ପତ୍ର, କାଠି କୁଟା ସବୁ ଶୁଖିଲା ଅବସ୍ଥାରେ ଅଛି ଯଦ୍ୱାରା ଏହି ମାଧ୍ୟମରେ ସାହି ଭିତରେ ମଧ୍ୟ ବ୍ୟାପି ଯିବାର ଭୟ ଥିଲା କିନ୍ତୁ ଉଚିତ ସମୟରେ ନିଆଁକୁ କାବୁ କରିଥିଲା ଅଗ୍ନିଶମ ବାହିନୀ । ଘଟଣା ସମୟରେ ପାଳ ଗଦା ମାଲିକ ଗଙ୍ଗାଧର ସୌରା କୌଣସି କାମ ପାଇଁ କଳାହାଣ୍ଡି ଯାଇଥିଲେ । ତେଣୁ ତାଙ୍କ ପରିବାର ଲୋକେ ଅଗ୍ନିଶମ ବିଭାଗକୁ ଖବର ଦେଇଥିଲେ । ଗାଈ ଗୋରୁଙ୍କ ଖାଦ୍ୟ ଜଳି ନଷ୍ଟ ହୋଇଯାଇଥିବାର ଆଗାମୀ ବର୍ଷା ଋତୁରେ କେମିତି ଖାଦ୍ୟ ଯୋଗାଡ଼ କରିବୁ ବୋଲି ପରିବାର ଲୋକେ ଚିନ୍ତିତ ଅଛନ୍ତି ।