ଦଶପଲ୍ଲା: ଦଶପଲ୍ଲା ବ୍ଲକ୍ ଘୁଗୁଡିପଡା ଗ୍ରାମପଂଚାୟତ ଅନ୍ତର୍ଗତ ଲୋଧାପଂଗା ଗ୍ରାମର ନିରଂଜନ ଜାନୀଙ୍କ ପୁଅ, ଚୈତନ୍ୟ ଜାନୀ (୩୦) ଗତ ବୁଧବାର ଅପରାହ୍ନରେ ରାସନ ସାମଗ୍ରୀ ପାଇଁ, ଘୁଗୁଡିପଡା ପଂଚାୟତ କାର୍ଯ୍ୟାଳୟକୁ ନଦୀ ପାରହୋଇ ଯାଉଥିବାବେଳେ ଖରସ୍ରୋତା ବୃତ୍ତଙ୍ଗ ନଦୀର ପ୍ରଖର ସୁଅରେ ଭାସିଯାଇଥିଲେ । ଖବରପାଇ ଗ୍ରାମବାସୀ ଓ ଆତ୍ମୀୟସ୍ୱଜନ ଗତକାଲି ରାତିସାରା ଖୋଜାଖୋଜି କରିବାପରେ ଆଜି ପୂର୍ବାହ୍ନରେ ତାଙ୍କ ମୃତଦେହ ନିକଟସ୍ଥ ଚମ୍ପାଡାଳି ଗ୍ରାମ ନିକଟରେ ଭାସୁଥିବା ଅବସ୍ଥାରେ ଠାବ କରାଯାଇଛି । ଆଜି ପୂର୍ବାହ୍ନରେ ଗ୍ରାମବାସୀଙ୍କ ସହାୟତାରେ ଶବ ଉଦ୍ଧାର କରାଯାଇଥିଲା । ପ୍ରକାଶ ଥାଉକି ପ୍ରତିବର୍ଷ ଖରସ୍ରୋତା ବୃତ୍ତଙ୍ଗ ନଦୀରେ ଭାସିଯାଇ ଅନେକ ବ୍ୟକ୍ତିଙ୍କର ପ୍ରାଣହାନି ଘଟୁଥିବାବେଳେ ପ୍ରସାଶନ ମୃତ୍ୟୁକାଳୀନ କ୍ଷତିପୂରଣ ଦେବାରେ ଟାଳଟୁଳ ନୀତି ଅବଲମ୍ବନ କରୁଥିବା ଅଂଚଳର କିଛି ବୁଦ୍ଧିଜୀବୀ ପ୍ରକାଶ କରିଛନ୍ତି । ଘଟଣାସ୍ଥଳରେ ଦଶପଲ୍ଲା ପୋଲିସ ପହଞ୍ଚି ଅଧିକ ତଦନ୍ତ ଜାରି ରଖିଥିବାବେଳେ ମୃତଦେହ ବ୍ୟବଚ୍ଛେଦ କରିବା ପାଇଁ ଦଶପଲ୍ଲା ଡାକ୍ତରଖାନାକୁ ଆଣିଥିବା ସୂଚନା ମିଳିଛି ।