ନୂଆପଡା : ନୂଆପଡ଼ା ଜିଲ୍ଲା ଖଡିଆଳ ଥାନା ଟ୍ରକ୍ ଧକ୍କାରେ ଜଣେ ନାବାଳିକାଙ୍କ ମୃତ୍ୟୁ ହୋଇଥିବା ଜଣାପଡିଛି । ନୂଆପଡ଼ା ଜିଲ୍ଲା ସାନମହେଶ୍ୱର ଗାଁ ନିକଟ ଜାତୀୟ ରାଜପଥରେ ଏହି ଦୁର୍ଘଟଣା ଘଟିଛି । ଦୁର୍ଘଟଣା ଏତେ ଭୟଙ୍କର ଥିଲା ନାବାଳିକାଙ୍କ ମୃତଦେହ ରାସ୍ତାରେ ମିଶି ଯାଇଥିଲା । ମୃତକ ନାବାଳିକା ଜଣଙ୍କ ହେଲେ ସାନମହେଶ୍ୱର ଗାଁର ହର ସୁନାନୀଙ୍କ ୫ ବର୍ଷର ଝିଅ ଡିମ୍ପଲ ସୁନାନୀ । ସୂଚନା ଅନୁସାରେ, ଖଡିଆଳ ସହର ପଟୁ ରାୟପୁର ଅଭିମୁଖେ ଏକ ଦ୍ରୁତଗାମୀ ଟ୍ରକ ଯାଉଥିଲା । ଏହି ସମୟରେ ସାନମହେଶ୍ୱର ଗାଁ ନିକଟରେ ଡିମ୍ପଲ ରାସ୍ତା ପାରି ହେଉଥିବାବେଳେ ଟ୍ରକ୍ ଚାପି ଦେଇଥିଲା । ଦୁର୍ଘଟଣା ଏତେ ଭୟଙ୍କର ଥିଲା ଯେ ଡିମ୍ପଲଙ୍କ ମୃତଦେହ ରାସ୍ତାରେ ମିଶି ଯାଇଥିଲା । ତେବେ ଦୁର୍ଘଟଣା ଘଟାଇ ଟ୍ରକ ଫେରାର୍ ହେବାକୁ ଚେଷ୍ଟା କରିବା ବେଳେ ସ୍ଥାନୀୟ ଲୋକେ ପିଛା କରି ୧ କିଲୋମିଟର ଦୂର ବଡମହେଶ୍ୱର ଗାଁ ନିକଟରେ କାବୁ କରିଥିଲେ । ଟ୍ରକ ଡ୍ରାଇଭର୍ ଘଟଣାସ୍ଥଳରୁ ଫେରାର୍ ହୋଇଯାଇଥିଲା । ଘଟଣାସ୍ଥଳରେ ଉତ୍ତେଜନା ଲାଗି ରହିଥିବା ବେଳେ ମୃତକଙ୍କ ପରିବାରକୁ କ୍ଷତିପୂରଣ ଦାବି ନେଇ ଗାଁ ଲୋକେ ୩୫୩ ନଂ ଜାତୀୟ ରାଜପଥକୁ ଅବରୋଧ କରିଛନ୍ତି । ଫଳରେ ଯାନବାହାନ ଚଳାଚଳ ବାଧାପ୍ରାପ୍ତ ହୋଇଛି । ଖବର ପାଇ ଖଡିଆଳ ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଜାରି ରଖିଛନ୍ତି ।