ଜୟପୁର,: ଅବିଭକ୍ତ କୋରାପୁଟବାସୀଙ୍କ ଲାଗି ଆଉ ଏକ ଖୁସି ଖବର । ଭୁବନେଶ୍ୱରରୁ ଜୟପୁରକୁ ଆଉ ଏକ ଯାତ୍ରୀବାହୀ ବିମାନ ଚଳାଚଳ କରିବ । ବିମାନସେବା ପ୍ରଦାନକାରୀ କମ୍ପାନି ଇଣ୍ଡିଆ ୱାନ୍ ଏୟାର ପକ୍ଷରୁ ଦ୍ୱିତୀୟ ବିମାନଟି ଉଡ଼ାଣ ଭରିବ । ଫଳରେ ଭୁବନେଶ୍ୱର-ଜୟପୁର-ଭୁବନେଶ୍ୱର ମଧ୍ୟରେ ଅଧିକ ଯାତ୍ରୀ ଯିବାଆସିବା କରିପାରିବେ । ଏ ସମ୍ପର୍କରେ ଟୁଇଟ୍ ଯୋଗେ ସୂଚନା ଦେଇଛନ୍ତି ରାଜ୍ୟ ପରିବହନ ମନ୍ତ୍ରୀ ଟୁକୁନି ସାହୁ । ଭୁବନେଶ୍ୱରରୁ ଜୟପୁରକୁ ବିମାନ ଚଳାଚଳ ସଫଳ ହେବା ପରେ ଇଣ୍ଡିଆ ୱାନ ପକ୍ଷରୁ ଆଉ ଏକ ବିମାନସେବା ଯୋଗାଇଦିଆଯିବ ବୋଲି ଏଥିରେ କହିଛନ୍ତି । ୯ ଆସନ ବିଶିଷ୍ଟ ବିମାନଟି ଆସନ୍ତା ଜାନୁଆରୀରୁ ସେବା ଯୋଗାଇବ ବୋଲି ଜଣାପଡ଼ିଛି । ତାରିଖ ବାବଦରେ ପରିବହନ ବିଭାଗ କିମ୍ବା ଇଣ୍ଡିଆୱାନ୍ କମ୍ପାନି ପକ୍ଷରୁ କୌଣସି ସ୍ପଷ୍ଟ ସୂଚନା ଦିଆଯାଇନି ।
ଶ୍ରୀମତୀ ସାହୁଙ୍କ ଏଭଳି ଟ୍ୱିଟ ପରେ ଜିଲ୍ଲାବାସୀଙ୍କ ମଧ୍ୟରେ ଖୁସିର ଲହରି ଖେଳିଯାଇଛି । ଭୁବନେଶ୍ୱରରୁ ଆଉ ଏକ ବିମାନ ଚଳାଚଳ କରିବାକୁ ଦାବି କରିଥିଲେ ସ୍ଥାନୀୟ ବିଧାୟତ ତାରାପ୍ରସାଦ ବାହିନୀପତି । ଏ ସମ୍ପର୍କରେ ରାଜ୍ୟ ସରକାରଙ୍କୁ ସ୍ମାରକପତ୍ର ଦେଇଥିଲେ ।
ସୂଚନାଥାଉକି, ଗତ ଅକ୍ଟୋବର ୩୧ରେ ଭୁବନେଶ୍ୱର ଏୟାରପୋର୍ଟରୁ ଜୟପୁରକୁ ଯାତ୍ରୀବାହୀ ବିମାନସେବା ଆରମ୍ଭ ହୋଇଥିଲା ।