ହରଭଙ୍ଗା : ବୌଦ୍ଧ ଜିଲ୍ଲା ହରଭଙ୍ଗା ବ୍ଲକ ବୀରନରସିଂହପୁର ଗ୍ରାମ ପଞ୍ଚାୟତ ଅଧିନସ୍ଥ ମହାକୁଡ଼ପାଲି ଗ୍ରାମରେ ଆଜି ସନ୍ଧ୍ୟା ସମୟରେ ଶିବ ଦନାୟକଙ୍କ ପୁଅର ବିବାହ ପ୍ରସ୍ତୁତି ପାଇଁ ମିଠା ସାମଗ୍ରୀ ତିଆରି କରାଯାଉଥିବା ବେଳେ ଗ୍ୟାସ ସିଲିଣ୍ଡରରେ ନିଆଁ ଲାଗିଯାଇଥିଲା । ପରିବାର ଲୋକ ବିଭିନ୍ନ ଚେଷ୍ଟା କଲା ପରେ ମଧ୍ୟ ନିଆଁ ଆୟତ୍ତ କରିପାରିନଥିଲେ । ଦେଖୁ ଦେଖୁ ହଠାତ୍ ନିଆଁର ପ୍ରକୋପ ବୃଦ୍ଧି ପାଇଥିଲା । ଏହାକୁ ଦେଖି ପରିବାର ଲୋକେ ବୌଦ୍ଧ ଦମକଳ ବାହିନୀକୁ ଖବର ଦେବାରୁ ସଂଗେ ସଂଗେ ଅଗ୍ନିଶମ ବାହିନୀର କର୍ମଚାରୀମାନେ ଘଟଣା ସ୍ଥଳରେ ପହଞ୍ଚିଥିଲେ । ଅଗ୍ନିଶମ ବାହିନୀର ମୁଖ୍ୟ ପରମାନନ୍ଦ ଲେଙ୍କାଙ୍କ ତତ୍ତ୍ୱାବଧାନରେ ସହକର୍ମୀ ତପନ ଗୌଡ଼, ହାବିଲଦାର ଅର୍ଜୁନ ନାୟକ, ଗୋବର୍ଦ୍ଧନ ବେହେରା, ପ୍ରଦୀପ୍ତ ସ୍ୱାଇଁ, ନିରାକାର ବେହେରା ପ୍ରମୁଖ ନିଆଁକୁ ଆୟତ୍ତ କରିଥିଲେ । ଉକ୍ତ ଅଗ୍ନିକାଣ୍ଡରେ ପରିବାରର କୌଣସି କ୍ଷତି ହୋଇନାହିଁ ବୋଲି ଅଗ୍ନିଶମ ମୁଖ୍ୟ ଶ୍ରୀ ଲେଙ୍କା ପ୍ରକାଶ କରିଛନ୍ତି ।